SHILLONG: Chatro chatrirangni gisepo Science-ni pal gipin subject-rangkosa ra·giparang batroroengani gimin jajrengchakani ong·engon, a·doko aro mongsongbate songadam nokadamrangode namnamgipa Mathematics aro Science skigiparang dongkujaenga ine a·dokni Education Minister Rakkam A Sangma parakataha.
“An·chingo, mongsongbate songadam nokadamrango namgipa Science aro Mathematics skigiparang dongkujaengani a·sel neng·nikaniko chagrongna nangkuenga. Iani giminba chatro chatrirang, ia subject-rango gisik nanga komienga,” ine Sangma aganaha.
Meghalaya a·doko Science stream-ko on·enggipa college aro skulrang komikuenga ine an·tangni suk ong·gijaniko parakatengon, mikkang bilsionide Sohra Government College, Williamnagar Government College aro Baghmara College-oba Science aro Commerce stream-ko a·bachengatna siengaha ine Education Minister parakataha.
Chatro chatrirang, Science aro Mathematics subject-rangna kenjachina gita sorkari, bang·en program-rangko a·bachengatahachim ine janapatskaengon, skigiparangni bangbang ong·e dongenggipa pilak biaprangkon gapattokjok ine Sangma parakataha.
“Je bangki dongkuenggipa biaprangkoba election-na dongimin model code of conduct matchotahaon sorkari gapattokgnok,” ine ua aganaha.
Budbar salo parakatgipa HSSLC Science aro Commerce porikkani result-rango chatro chatrirangni pass ka·ani percentage ia change nambatkalaha ineba ua an·tangni kusi ong·aniko parakataha.
“Ian namgipa chinni a·bachengani ong·enga,” ine Education Minister aganaha.
