SHILLONG: DGP, Home Minister, Chief Minister ba AL Hek-ba ong·bo mande-ni kosako maikoba namgija dakako rim·a man·a ong·o-de dingtang dingtang niamni provision-o pang-chake mamlako segatangna nanga, ine BJP-ni a·gipi dilgipa aro Cabinet Minister AL Hek Sonibar salo aganangaha.
“Iano DGP, Home Minister ba Chief Minister ba AL Hek ong·a ong·ode sakantian mamlako segat-angna nanga uamang manderangni kosako ong·gijako daka ong·ode,” ine Hek aganaha.
A·dokni DGP Lajja Ram Bishnoi-ni kosako gari registration ka·gimin num-ber plate-ko jakkalsretanina mijamangmang mamla segatanganina ua ia kattarangko aganangaha.
“DGP ba jean iano bak donga anga mamla gimik-kode poraijaha indiba DGP-ba ong·chong ba angaba ong·chong manderangni kosako namgijako daka ong·ode angaba mamlako segataigen. Niamko jarik-angna nanga,” ine ua Hek aganaha.
DGP-ni kosako Meghalaya police mamlako segataha, uni official garini number baksa bilko aro uni gadangko jakkalsretanina kamoni dondipata man·-gipa police officer Gabriel K Iangrai gitcham dilgipani kosako dosi pote badi ka·aha.
DGP jean May 19 tariko kamoni watna tarigipani kosako cha·bokanina aro sea jotani kamo tol·anina badi ka·an baksana ka·donganiko pe·gipanina aro uamangni gisepgriko mikkangchina namgija kamko ka·na miksongani gadango Iangrai badi ka·angaha.
Sadar police station-o badi ka·ao Iangrai aganaha, am·sandigipa committee-ko 2022 bilsini July 18 tariko songaha aro iani report-o indake seaha, Central Workshop-o Hyundai Verna gariko salbae donaha jeon tol·gipa number-ko tapaha. AIG-A gariko register ka·jaha aro garini lekkarangko on·angna man·jaha, ine seao janapaha.
Right to Information (RTI)-ni gita seatgipa chittina ua aganangaha, Kia Carnival limousine gari gipokko number registra-tion ka·aha jeon DGP a·dok Tourism department baksa register ka·gipa Verna 1.6 VTVT-ko jakkalmanchagipa ong·a.
Bishnoi Shillong-ona 2023 bilsini May 17 tariko Assam sorkari baksa register ka·gipa gipok Kia Carnival gario DGP ong·e kam ka·angna sokbaaha aro da·ao Verna gari baksa number plate-ko jujaat-skaha ine Iangrai aganaha.
A·dokni niam reti-ko jakkalangani bidingo ua aganangaha, an·ching economi gadango dal·ro-rona sika ong·ode aro an·chingni janggi tanga-niko silroroatna sika ong·o-de an·ching niam retiniko chu·gimik control ka·na nanga. Niam reti-ko jarikna nanga.
“An·ching toursit-rango pangchake janggi tanga aro ian dal·roroba-enggipasan ong·a aro indakgipa a·selrang nam-gijagipa bimingko man·ata aro ian a·dokni man·gni-rangna gimaaniko ra·bagiparang ong·a,” ine ua agandapangaha.
