Shillong songjinmao niamko ja·rikgijanirang batroroengani bidingo sorkari dal·e ra·jaenga

SHILLONG: Shillong a·ani niamko ja·rikgijagipa songjinma ong·baengama aro sorkario aro bil gnang-giparang baksa ja·rikna nangchongmotgipa ra·gat-gimin a·ani niamko dal·e ra·gija uamang jeko dakna ska uko dakna mande-rangna jakgitele on·enga.
Shillong-o ritchani ritchani manderang bil gnanggiparangchi maming rate tik ka·e on·ani ba maming ra·chakani gri uamangni an·tangtangni namnika gita motor-bike taxi-rangko chalaina ba watna a·bachengengaha.
Bil gnanggiparang ua obostani gimik mikandal-giparang ong·skaenga maina bang·a motor-bike taxi chalaigiparang ian uamangni janggi tangani chol ong·a ine aganenga.
Janggi tangani mong-songgipa ong·engon Shil-long-o motor-bike-rangko para sale chalaie janggi tanganiko a·bachengatna jenanba indin on·aiaima aroba para ba naljokani gimin maming janapani dongja.
Sorkari ru·utgija salo Meghalaya Taxi Aggre-gator Operational Rules, 2020-ko tariaha aro Licensing Authority-oniko Agent-ni license-ko man·gipa company ba firm ba mande ong·jaskal Meghalaya a·dokni ning·o Taxi Agreegator ong·e darang company ba firm ba mande ua niamko ja·rikna nanggen ine rongtalataha.
Bike taxis baksana, rama-soroksamo palgipa-sim-giparangni neng·nikani-rangba bilongangengaha. Sorkari sak 200-300-mang rama sambao palgipa-simgiparangko jitatna niengon Police Bazar, Polo aro Motphran a·jolo sak 1400-mang palgiparang donga.
Aiao inmanpilani, rama-ko aro mitam a·jolrango manderang ja·achi re·eng-on mitam palgiparang ramaon tikon uamangni pala-simanirangko dak-engako nikenga, biap dongpilgija rama gimikkon palgiparang a·kanggopai-engakoba nikenga.
Bilsini bilsirang re·ang-aha Police Bazar-o palgipa-rangko jitatna administra-tion ba sorkarini maming gisik nanggijaniko mesokenga.
Local taxirang re·ba-enga, iano apsan obosta ong·enga, taxi-rang ding-tangmancha attamrango sorkarini para ra·china dongimin gita ong·gija uamang an·tangtangni namnika gita skatang taxi pararangko ra·kuenga, uamang nanga bate manderangkoba gatenga indiba bil gnanggiparang mamingkon chek ka·na dal·e ra·ja aro simsakja aro uamangni ska-namnika gita jekoba dakna jakgitel on·aia.
Apsandake niam aro retinini bidingoba batang-gimin bang·a bilsirangonin ming 14-mang mande so·otani mamlao jemangan ru·utgija salo rim·ako man·aha adita sak mande-rang ua mamlao donga indiba Meghalaya police ua batanggimin bang·a bilsirango uamangko rim·na dal·ean ra·ja.
Bang·a bilsirangni ja·mano ru·utgija sal mangmango Meghalaya police uamangko rim·aha indake ia obostarangko nike Shillong songjinmao a·ani niamrangko mande-rangni ontisaba  ja·rikna simsakjaenganiko sorkari mesokenga.