SHILLONG: A·chik National Volunteers Council (ANVC/ANVC-B) dolrangni ma·mong aro a·dok sorkarirang baksa songgigrikanichisa NH-51 aro NH-62 ramarangko tarina gita project-rangko man·baaha ine Tura-ni MDC aro BJP-ni state vice president Bernard N Marak a·kangatenba, ia ramarangko BJP, skatang tarie galna on·jawa ine mikrakataniko on·angaha.
Blacklist ka·ako man·gipa ARSS Infrastructure Projects Ltd company-na Garo Hills-o iandakgipa kamrangko ka·na on·enga ine Marak matnangatenba, ia ramarangko skatang dake tarie galna on·jawa ine mikrakataniko on·ataha.
ARSS company-na Garo Hills-o kamrangko on·ahani gimin adita salrangna skangsan ua, NPP-chi dilenggipa MDA sorkariko sing·doatahachim.
Marak-ni talatani gitade, National Highway (NH-51) ramako matchotatna gita Manoranjan Company-nasa on·chengahachim indiba ia company somoi gita kamrangko matchotatna man·jahani gimin ja·mano kamrangko Shubham minggipa company-na on·skaahachim.
“Ia company-ko ARSS-sa chalaienga aro kam ka·giparang gimikan ARSS-nisa ong·a. Shillong-Dawki ramako tarianirang namjani giminan ARSS company-ko ‘blacklist’ ka·ahachim indide maini gimin ia company-na Garo Hills-o kamrangko on·engkua,” ine Tura-ni BJP MDC sing·doatahachim.
“Iandake biming namgijako man·gipa company-rangni a·doko kam ka·aniko chinga nangnikja. Meghalaya a·dokni gipin bakrangode ARSS company-ko kam ka·na on·jahachim indide maini gimin Garo Hills-o ia company-ko kam ka·na on·engkua. Manderang ia company-ni kamrango kusi ong·jae angna badi ka·tokenga,” ineba Marak parakataha.
Iani bidingo a·dok sorkarini talatanina aganchakaniko on·angskaengon, “Chinga iani bidingo NHIDCL aro ma·mong sorkariona ra·anggen indiba da·o dipet gital sorkari rikaniko sengkugen. Office-ni gita chinga maikai kamrangko ka·enga aro ARSS an·tangna on·gimin daitoko maikai ka·enga, ia pilakon chinga sing·sandigen,” ine BJP-ni state vice president parakataha.
Iani bidingo uamang kakketko sandigen ine janapatengon, ia kamrangko gipin company-ni bimingo ARSS company-nan on·aha ine Marak matnangataha.
“NH-51 aro NH-62 ramarangko tarianiara, 2014 bilsio ANVC aro ANVC-B dolrangni songgigrikanio soi ka·na skang dabigiparangan ong·a aro iani giminsa chinga ia ramarangko skatang tarie galna nangnikjaenga. Jekon chinga ma·mong sorkari baksa songgigrike Garo Hills-na man·bae on·aha, uandakgipa kamrangko chinga maming dakeba nosto ka·na on·jawa,” ine Marak parakataha.