SHILLONG: Ma·mongo gital sorkariko rikmanahaon, Meghalaya a·doko Inner Line Permit (ILP)-ko ra·gatchina dabienggipani bidingo agangriktaichina gita NPP-chi dilenggipa MDA sorkariko Khasi Students Union (KSU) didiataha.
KSU-ni general secretary Donald V Thabah-ni parakatani gitade, Eastern Bengal Frontier Regulation 1873-ni Preamble-o Khasi-Jaintia Hills-koba janapani dongani gimin Manipur a·dokna ILP-ko on·na man·aha ong·ode Meghalaya a·doknaba on·na nangani ong·engachim.
“Meghalaya a·doko BJP sorkari dongkujani giminsa ma·mong sorkari, a·dokna ILP-ko on·na man·jaengama ine a·dok sorkari sing·na nanga. Gimikande politics-o ong·na nangjani gimin sorkari ia sing·aniko sing·telna nanga. Chonchongipa jatrangko chel·chakanian sorkarini mongsonggipa daito ong·na nanga,” ine Thabah aganaha.
A·doko songdongenggipa Tribal jatrangko chel·chakna gita a·dokna ILP-ko nangan baksana Autonomous District Council (ADC)-rangko mangrakbatatna nangenga ine janapatengon, “ILP-ko man·ja ong·ode an·ching Tribal jatrangde a·doktangon chonchonbatgipa jatrangsa ong·aignok,” ine KSU-ni general secretary parakataha.
A·dok aro a·songni simarango songdongenggipa manderangko chel·chakna nangengani giminba ua janapataha.
Sima jolrango songdongenggipa manderang saknaanirangko chakna nangtokkuenga ine janapatengon, Assam aro Meghalaya a·dokni simarango so·sojengjeng ong·anirangchi manderangni gamchatgipa janggirang gimana gita nangengani gimin ia meligrikgijaniko ta·raken namatna nangchongmotengaha ine KSU-ni dilgipa, a·dok sorkariko didiataha.
Garo Hills-ni simarangode iandake meligrikgijanirang dongjani gimin dolgnini gisepo dinggrikanirangko nikna nangjaenga ineba ua aganaha.
Meghalaya a·dokona re·napbaenggipa manderangko nambate nirok sandina man·na gita ta·raken Meghalaya Residents Safety & Security Act (MRSSA) ba ILP-ko ra·gatna nangchongmota ineba Thabah dabiangtaiaha.
Aradonga-o donggipa infiltration gate gita maming lekka gri gipin biaprangoni bang·bea manderangko gari bolsao re·napbaako nika ine kobor man·soani ja·man a·doko ta·raken MRSSA ba ILP-ko ra·gatchina sorkario dabiangaha.
 |
ReplyForward
|
