SHILLONG: Kamoni neng·takangani ja·manba, Meghalaya a·dokni Director General of Police (DGP) Lajja Ram Bishnoi-ni kosako badi ka·anirangko sandirokangkuaigen ine Budbar salo, a·dokni Chief Minister Conrad K Sangma parakataha.
Official-ni kamna on·gipa registration nomborko jakkalsrete an·tangni garioba jakkalaha ine DGP-ni kosako gitcham Assistant Inspector General (AIG) GK Iangrai, police-rangna badi ka·doangahachim ine nikna man·a.
Da·o ong·enggipa DGP LR Bishnoi, May 19 tarikon kamtangoni neng·takangengahachim ineba nikna man·a.
Indake ong·engon a·dokni DGP, kamoni neng·takangani ja·manba uni kosako sandirokanirangkode dakangkuaigen ine Chief Minister talataniko on·angaha.
“DGP-ni kosako FIR ka·ahani gimin police-rang mokordomako segataha, uni gimin ua kamoni neng·takanggenchimoba uni kosako sandirokanikode dontongjawa,” ine Sangma, kobor ra·timgiparangna aganaha.
Chief Minister-ni parakatani gitade, mande jeba ong·china, uni kosako maiba ong·gija kamrangna FIR ka·genchimode niamo pangchake uni kosako sandirokanirangko dakna nangtelaia.
An·tangni official garina on·gipa registration nomborko jakkalsretaha ine matnangenba, re·anggipa May-ni 9 tariko gitcham AIG GK Iangrai, a·dokni DGP LR Bishnoi-ni kosako FIR ka·doangahachim.
Iani bidingo Sadar police station-o FIR ka·doangengon, 2022 bilsio inquiry committee-ni report-o janapani gita central workshop-o park ka·e dongipa Hyundai Verna-ko ua (Iangrai) register ka·gija tol·gipa nombor-rangko on·e an·tangni kamrangnasa jakkalaha ine parakanikoba Iangrai jegalatahachim.
Iani bidingo aganchakaniko on·atengon, inquiry committee-ni membor-rang, biapona re·e nigija aro Transport department-ni record-rangko nichenggijasa report-rangko tariaiaha ine Iangrai matnangataha.
Gitcham AIG Iangrai-ni parakatani gitade, re·anggipa 2023 bilsio uni RTI ka·e am·sandion, inquiry committee-ni janapgipa Hyundai Verna gariko Transport Department-o register ka·e ML-02A 0001 registration nombor plate-ko man·aha aro iakon DGP-na office-ni kamna on·aha ine ma·sina man·ahachim.
2022 bilsio, Meghalaya a·dokni DGP ong·e kamko jako ra·na re·bachengani somoio DGP Bishnoi, Assam sorkario register ka·gipa gipok Kia Carnival Limousine model gariosa re·baahachim indiba da·o ua ia gario, Verna Hyundai-na register ka·gipa ML-02A 0001 nomborkon jakkalskaenga ineba Iangrai matnangatahachim.
Meghalaya a·dokni DGP-na gong lak 12 ong·gipa damonasan garirangko jakkalna niamrang dongaiachim indiba DGP Bishnoi-ni jakkalenggipa Kia Carnival Limousine garide gong lak 40-mang gapa ineba Iangrai matnangatahachim.
Indake ong·engon, niamde pilaknan apsan ong·a aro niamni kosako darangba dal·batna gita man·ja ine Chief Minister parakatenba, DGP-ni kosako FIR ka·ahani gimin niamo pangchake ja·kurangko de·angaigen ine talataniko on·ataha.
DGP LR Bishnoi an·tangba an·tangni kosako FIR ka·aniko jegalchina gita Meghalaya High Court-ko didiatahachim ine nikna man·a.
Iani bidingo Meghalaya HC-na sedoatengon, uni kosako ka·gipa FIR-ara rakkie donna man·gipa ong·ja aro ia FIR-ko jegalatna nanga ine DGP, High Court-ko didiataha.
Kamko ka·engmiting somoio gitcham AIG ong·gija dakanina kam dontongatako man·ahani giminsa uni kosako a·jak sokpangpilna ia FIR-ko ka·aha ineba DGP Bishnoi matnangataha.