SHILLONG: Budbar salo, North Eastern Hill University (NEHU) Shillong campus-o Common University Entrance Test (CUET) undergraduate (UG) 2024-ko seanio chatro chatrirang adita neng·nikanirangko chagrongna nangtokahani gimin Khasi Students Union (KSU), suk ong·gijaniko parakatenba, iani bidingo a·dokni Education Minister Rakkam A Sangma-ba badi ka·e sedoataha.
Koborko on·ani gitade, NEHU Shillong campus-o ia CUET porikkana centre damgittamko, chong·motan Social Science cluster, Science cluster aro NEHU-ni Kendriya Vidyalaya School-ko donsoahachim indiba roll nombor baksa room nombor-rangko mesoke on·na gita maming chinrang dongjani a·selo chatro chatrirang biaptangtangko sandianio neng·nikanirangko chagrongna nangtokaha.
Unbaksana biometric system kam ka·jani a·selba English porikkako ra·ani kontagni ja·manchakna nangaha ine kobor on·aha.
Apsan daken General Studies-ko segiparangba porikkako a·bachengatanio ja·manchakahani a·sel walni 9:30 bajimangosa matchotaha ine kobor on·aha.
Iana agreba, ia CUET centre-rango invigilator-ni kamko ka·giparang pring 10:00 bajioni wal 9:00 bajiona kingking kamrangko ka·na nangtokahaoba maming cha·ani ringanirangko on·giparang dongjaha ine kobor on·aha.
Iani bidingo suk ong·gijaniko parakatengon, ia pilakan a·dok sorkari aro university-ni gita ia porikkako ong·atna tarisamsoanirang chu·ongjahani a·selsa porikkako segipa chatro chatrirang aro kam ka·giparangba neng·nikanirangko chagrongna nangtokaha ine KSU parakataha.
Mikkangchi iandakgipa obostarang ong·taijana gita ta·raken iani bidingo namdapatanirangko dakchina a·dokni Education Minister-ko KSU didiataha.
