AMPATI: Ia 2024 bilsini Lok Sabha election-o be·enni gita cholgri ong·gipa manderangna aro butchuma budeparangna Election Commission-ni jakkalna on·gipa wheelchair-rangko South West Garo Hills a·jao jakkalna aro nirokna gita District Election Office, DRDA, Health aro Social Welfare Department-rang, Memorandum of Understanding (MoU)-o soi ka·grikangaha aro ia soi ka·grikanio, South West Garo Hills a·jani Deputy Commissioner Hema Nayak, ADC (Election) MLK Marak aro AC (Election) CRN Sangma-ba dongpaaha.
Wheelchair-rangko jakkalna aro nirokna gita MoU-o soi ka·gipa official-rangara, SWGH a·jani District Election Officer Hema Nayak, DRDA-ni Project Director RZD Shira, Ampati-ni District Medical & Health Officer H Barman aro Ampati-ni District Social Welfare Officer TK Marak ong·a.
Ia 2024 bilsini Lok Sabha election-ni kamrang chu·gimik matchotahaon ge 103 wheelchair-rangko DRDA-ni Project Director, DMHO, DSWO aro District Election Office-na pakwate on·anggnok.
Ia ge 103 wheelchair-rangoni ge 8-ko C&RD Block dambrina, dam 27 sub-centre-na damprako ge 2 ka·e, damsku PHC-rangna damprako ge 3 ka·e, CHC damsana ge 5 aro Ampati Hospital-na ge 4-ko on·e, ge 2-ko District Social Welfare Office-na aro bangki ge 3 wheelchair-rangko District Election Office jako ra·e nirokanggen.
Soi ka·grikgipa MoU-o janapani gitade, District Election Officer-ni on·atenggipa wheelchair-rangko kosako janapgimin department-rang nirokanggen aro wheelchair-rangko gipinrangna on·na man·jawa. Indake ong·genchimoba ia wheelchair-rangko changgipa election-o ba DEO-ni nangan somoirango ra·e jakkalpilskana man·gen.