TURA: Sukrobar salo, ICFAI University Meghalaya Tura Campus-ni gita Career Counselling program-ko Class 12-o poraienggipa chatro chatrirangna Garobadha Higher Secondary School-o ong·atangaha.
ICFAI-ni gita chatro chatrirangna uamangni changa sapani aro u·i-ma·siani kri kamrangko ka·e cha·na gita ku·pattianirangko on·na miksonganio ia Career Counselling program-ko ong·atangaha.
Ia program-ko ong·atanio ICFAI University-ni dingtang dingtang skigiparang, chatro chatrirangna dingtang dingtang kamrangko jako ra·e an·tangtangna janggi tangani chol dake ra·na gita agan-ku·pattianirangko on·angaha.
Ia caree counselling program-ko ong·atanio, ICFAI University Tura Campus-ni ning·o donggipa Management Department-ni Assistant Professor Dr Brenda D Marak, dingtang dingtang karkanarango kamrangko ka·e cha·ani cholrangni gimin aganangenba, ia university-ni gita bading chiwale cha·ani cholrangni bidingo on·enggipa course-rangni gimin chatro chatrirangna agan-talate on·angaha aro ia tom·anio ICFAI University-ni ning·o donggipa Information Technology Department-ni Head aro Assistant Professor Sumit Dey-ba chatro chatrirangna, IT industry-rango kam ka·e cha·ani cholrangni gimin agan-talate on·angskaaha. National Education Policy (NEP) 2020-ni giminba ua chatro chatrirangna agan-talate on·angjolaha.
Ia Career Counselling program-o ICFAI University Meghalaya Tura Campus-ni Senior Administrative Officer Muktadul Hussain-ba jinmana aganprakengon, “Da·alo chinga ia career counselling program-ko Garobadha Higher Secondary School-o ong·ate, chatro chatrirangna chu·sokgipa janggi tangani bidingo agan-ku·pattianirangko on·na man·ahani gimin kusi ong·a,” ine parakataha.
Ia Career Counselling program-ko ong·atahani gimin Garobadha HS School-ni Principal Bestling A Sangma-ba ICFAI University-ko aro university-ni skigiparangko mittelpilatskaaha.