SHILLONG: Sukrobar salo, dingtang dingtang a·jani Deputy Commissioner (DC)-rang aro Civil Sub-Divisional Officer (SDO)-rangni tom·bimonganiko Shillong-o ong·atangaha aro ia tom·anio a·dokni Chief Minister Conrad K Sangma baksana Social Welfare Minister Kyrmen Shylla-ba dongpae bak ra·angaha.
Sorkarini jako ra·enggipa kamrangni bidingo officer-rangna talate on·na miksonganio ia DC aro Civil SDO-rangni tom·bimonganiko ong·ataha aro ia tom·anio a·dokni Chief Minister, a·dok gimikni DC aro Civil SDO-rangna aganprakengon, sorkarini ra·gatgipa dingtang dingtang scheme aro program-rangko nambate chu·sokatna man·na gita dingtang dingtang gadangrango ku·mong nangrime kamko ka·china officer-rangko didiangaha.
A·dokni dal·roroanina aro namroro silroroanina pilak kamrangon manderangkosa skang donchina gitaba Chief Minister, DC aro SDO-rangko didiangaha.
“Ia tom·bimonganiara namen nangchongmotgipa ong·a maina DC aro SDO-rangni u·iatpilaniko chingni man·aniara manderangna namen nangchongmotgipa ong·a,” ine Sangma aganaha.
Meghalaya a·dokko 10 billion US dollar economy ong·atna sorkarini niksamsoenggipani bidingo janapatengon, ia miksonganiko chu·sokatna gita sorkarini kamo bak ong·enggipa mande sakantikon gisiko nange kam ka·china Chief Minister didiangaha.
Batanggimin bilsidokni gisepo a·dokni dal·roroani aro namroro silroroaniko mesokani chinrang namen tang·doangaha ine janapatskaengon, dingtang dingtang gadangrango ku·monggrikachi, nirok sandianirangchi aro dongnuani gri kamrangko ka·anichi ma·mong aro a·dokni scheme-rangko nambate chu·sokatna man·aha ine Chief Minister parakataha.
“Ma·mong aro a·dokni scheme-rangko chu·sokatanio saksa sakgipin baksa nambate agangrikanichi, nirok sandianichi, on·kanggrikanichi aro dongnuani gri kamko ka·anichisa nambate dakna man·aha,” ine Sangma aganaha.
Skulrangko, hospital-rangko, PHC-rangko, CHC-rangko aro uandake sorkarini dingtang dingtang kamrangko pangnan nirokjringchina aro dingtang dingtang cholrangchi sorkarina u·iatjringchina gitaba Chief Minister, dingtang dingtang a·jani DC aro SDO-rangko didiataha.