SHILLONG: Shillong songjinmao gital kulina sienggipa Shillong Medical College-o skigipani kamko ka·na gita seokako man·gimin Specialist doctor-rangna Sukrobar salo, Health & Family Welfare Department-ni gita orientation program-ko Hotel Marriot Shillong-o ong·atangaha.
Ia program-ko ong·atanio, Delhi-o donggipa Dr Baba Saheb Ambedkar Medical College-ni Director aro Principal Dr Achal Gulati, doctor-rangna aganprakengon, da·o dipet India a·songo dam 706 medical college-rang donga indiba Meghalaya a·dokode NEIGRIHMS-mangmangsan dongkuengani gimin medical college-rangko kulina nangchongmotenga ine aganangaha. Medical college-na a·doko komibeoba dam 300-400 seat-rang dongna nanga indiba da·o dipet Meghalaya a·doko dam 50 seat-rangsan dongkuenga ineba ua aganaha.
Gital medical college-ko kulianio pilak doctor-rangni bakrimanirangko nanggen ineba Dr Gulati parakataha.
Meghalaya a·dok namroro silrorona aro an·tangni medical college dongna nangchongmota ine janapatengon, a·dokni chatro chatrirangko doctor-rang ong·na gita cholrangko on·na nanga ine Dr Gulati aganaha.
Medical college aro hospital-o kam ka·giparangni, mongsongbate skie on·enggipa manderangni dakna nanggni kamrangko talate on·na miksonganio ia orientation program-ko ong·ataha.
