SHILLONG: Shillong aro Tura damgni Lok Sabha seat-rango NPP-na BJP-ni mijamangmang Lok Sabha election-na chakpaani NPP-na gimaani ong·genma. Political party-rangni aro u·i ma·sigiparangni aganangani gitade, iano jangbingbangenggipa kattarang donga jeon dingtangmancha Tura parliamentary constituency-o a·dokni voter-rang baksa BJP aro NPP nangrimgrikani namgipa ong·anggijaniko parakataha.
Dingtangmancha Chief Minister Conrad K Sangma Shillong-o gipin jat bang·bate donggipa biaprango Prime Minister Narendra Modi-ni bimingo vote-ko bi·angani ja·man NPP aro BJP bakrimanina Opposition dolrangba matnangaha.
Jensalo NPP-na BJP dolni chakpaani namja ong·ode ine sing·anina BJP a·gipi dilgipa aro Cabinet Minister AL Hek indake aganaha, ian manderangni chanchiasa, party-ni chanchia ong·ja. NPP-ni dilgiparang maming saloba uamang BJP-ni chakpaaniko bi·angjaha indiba Meghalaya-o NPP-na saffron party an·tangan chakpaaniko on·a namnikaha, ine ua aganaha.
Party dilgiparang campaign ka·ani somoio uamang chu·gimik chakpaaniko on·angajaha, ine matnangatanina Hek jegalate aganangaha, uni constituency-o NPP-na ua an·tangan campaign ka·angaha.
NPP-na kam ka·angna bang·a BJP worker-rang BJP dolni dilgiparangoni gisikni gita maming chakpaaniko man·soja, ine Hek aganaha, ian BJP dolni kam ong·ja indiba party jean poll-o susaangenggipana chakpaaniko on·angaha, BJP dolna NPP dakchakaniko on·angaha, une ua agandapangaha.
BJP dolna New Delhi-o Hek mijamangmang campaign ka·angao aganaha, TMC dilgipa aro gitcham Chief Minister Mukul Sangma party-o napna sika ong·ode ua rimchaksoa aro poll-ni ja·man a·doko bang·a dilgiparang BJP dolo napaha ineba janapataha.
