SHILLONG: Ong·telaigipa a·selrangchi neng·nikatanirang sokbagipako darangba agansona man·ja, Mawdiangdiang-o rikenggipa Assembly nok building-ko bera kadulgipa pakma tariaoni adita ruutgijan be·aha.
Koborrangko man·soani gitade bera kadulgipa pakmako songtangni contractor-rangchi tariaha ine parakataha.
“Anga angni ka·rimska manderangko watataha aro uamang nikaha jeon gital assemably nok building-oni kamachipak donggipa sima ari kadulgipa bera pakma be·aha.Assembly nokko bera ka·dulgipa pakma be·aha aro anga gualja ong·ode ian rika bilsi gittam gapaha. Kamrangko ka·angna songtangni contractor-rangna on·angaha,” ine Assembly Speaker Thomas A Sangma a·sel ong·ani bidingo sandirikitangani somoio u·iataha.
“Contractor-rangni giminde anga name dake u·ija maina contractor-rangna dingtang dingtang bakrangko sualangaha aro dingtang dingtang contractor-rangna kamrangko on·angaha aro anga jako ra·angna skangan tangka paisarangkoba gamanaha uni gimin anga contractor-rangni bidingo bang·e koborrangko on·angna man·jawa,” ine ua contractor-rangni gimin sing·anina aganchakangaha.
2022 bilsini May 22 New Shillong Township-ni Mawdiangdiang-o gitalgipa assembly nok building rikgipani dome ba nokni ku·chot be·aha. Shillong aro a·dokni ge·sa niksenggipa rikgipa dome ba nokni ku·chot ong·naba dongachim ine parakaraha.
Assembly nok building-ni niksenggipa dome jekon chasonggnina bate somoi nanggipako taripiltaianio gital noko dona ruutatani ja·man, sorkari bon·kamo, sorkarini chamgipa project-rangko simsakgija rike cha·bokenga ine parakatna nangnikenga.
Assembly project-ko Design aro Associate, Delhi-ni gita design ka·aha aro Uttar Pradesh Rajkiya Nirman Nigam Ltd-ni gita rika choaniko chu·sokatenga.
Indian Institute of Technology, Guwahati (IITG), jean ia a·sel ong·aniko sakki on·e report ge·antio aganaha, New Shillong Township-ni Mawdiangdiang-o Meghalaya Assembly nok building rikenggipani dome ba nokni ku·chot be·aha maina project-o kam ka·enggipaa contractor-rang aro design ka·gipani gisepgriko bakrimani dongja aro dugapile jriani a·sel ong·aha.
