SHILLONG: Meghalaya a·doko BJP-ni state president Rikman G Momin aro uni dol, Garo Hills-ni dilgiparangkode pilak kamrangon nichanggalenga aro adita salrangna skang ong·atanggipa Lok Sabha election-oba maming dakchakanirangko man·jaha ine BJP-ni mitam dilgiparang suk ong·gijaniko parakattokaha.
Ia dilgiparangni parakatani gitade, ia chang Lok Sabha election-o BJP-na kam ka·enggipa manderang, NPP-na chakpaanirangko on·ahaoba BJP-ni state president aro uni dol, tangka paisani gitaba maming dakchakanirangko on·jahachim.
“Election-ni somoio kam ka·giparangna tangka paisarangko on·jahani a·sel apsan bakrimska dolna kamrangko ka·anio bang·en neng·nikanirangko chagrongna nangtokaha,” ine BJP-ni mitam dilgiparang aganaha.
Election changantian kam ka·giparangna tangka paisani gita dakchakanirangko on·na nanga indiba ia chang election-ode dilgiparangoniko kam ka·giparang tangka paisani gita dakchakanirangko man·tokjaha ineba ia dilgiparang matnangaha.
Lok Sabha election-o BJP-na kam ka·giparang NPP-na kamrangko ka·e on·ahani gimin tangka paisarangko on·anide NPP-ni daitosa ong·a ine adita salrangna skangsan BJP-ni dilgipa AL Hek aganskaahachim.
Indake ong·engon, BJP-ni gital state president Rikman Momin-ni ning·o a·dokni BJP dol pilakni gitan be·grugipa gitasa ong·enga ine BJP-ni mitam dilgiparang janapatenba, uamang BJP Meghalaya in-charge Chuba Ao-ni kamrangoba kusi ong·gijaniko parakattokaha.
Chuba Ao saksa chugipa gadangni dilgipa ong·genchimoba, ia chang Lok Sabha election-o a·doko susana gita ma·mongni dilgiparangko didina man·jaha ineba BJP-ni mitam dilgiparang matnangataha.
Iani bidingo BJP-ni spokesperson Mariahom Kharkrang-o sing·sandiatskaon, election-ni somoio tangka paisarangko on·jani gimin da·o dipet uamang darangonin badi ka·anirangko man·soa dongkuja ine parakatskaaha.
