TURA: Meghalaya a·dokni State Reservation Policy-ko gital dake nipiltaina siengani gimin Reservation Policy-ko nipiltaianio A·chikrangna dongimin bak rengsiko gimaatna nangjana gita iani bidingo dabidilna Garos Reservation Policy Demand Committee (GRPDC)-ko Robibar salo songe donangaha.
Ia demand committee-ko dilna gita seokako man·gipa manderangara, president-na Dr Meril N Sangma, vice president-na Coffpelsil R Marak, Gredason Ch Momin aro Landsdown Ch Momin, secretary-na Insting C Marak, joint secretary/ treasurer-na Advocate Bernita Rangsa Marak, publicity secretary-na Amsrang D Momin, organizing secretary-na Balkarin Ch Marak aro Chevibirth K Marak ong·a.
GRPDC-ni president Dr Meril N Sangma-ni u·iatani gitade, ia committee-ko songani mongsonggipa miksonganiara, 1972 bilsini State Reservation Policy-ko kal·akgija apsan daken ja·rikangkuchina a·dok sorkario dabianian ong·enga.
“Uni gimin 1972 bilsio je reservation policy-kon tariahachim, iano maming dingtanganiko ra·bagija apsan niamkon ja·rikangkuchina chinga sorkario dabianggen,” ine Dr Sangma parakataha.
Meghalaya State Reservation Policy-ko gital dake nipiltaina a·dok sorkari, dingtangmancha expert committee-ko songe on·ahachim aro ia expert committee, a·doko songdongenggipa manderang aro dingtang dingtang dolrangni ku·pattianirangko re·baenggipa June 15 tarikni gisepon on·china u·iataniko on·manahachim.
Da·o dipet a·doko ja·rikenggipa Reservation Policy-ara Khasi-Jaintia-rangna 40%, Garorangna 40% aro gipinrangna 20% ong·engachim.