TURA: Ia bilsio Common University Entrance Test (CUET) porikkako skanggipa changna Meghalaya a·dokoba ong·atanio Shillong songjinmani badiaba badiaba centre-rango porikkako segipa chatro chatrirang aro nirokgiparangba neng·nikanirangko chagrongna nangtokahaoba Tura-ode ia porikkako maming neng·nikani grian matchotatna gita man·skaaha.
Tura-o CUET porikkako May 15 tarikoni May 18 tarikona gimik dam 10 centre-rango ong·atangahachim aro ia centre-rangara Tura Don Bosco College, Tura Government College, Tura Government Boys School, Don Bosco Higher Secondary School, Tura Government Girls School, Christian Girls School, St. Xavier’s School, St Mary’s School Araimile, Montfort High School, aro Pechon Memorial School-rang ong·achim.
Indake ong·engon, Tura ia CUET porikkako ong·atanio district administration, police, district school education office aro dingtang dingtang department-rangba ku·mong nangrime kamrangko ka·ahani a·sel maming neng·nikani grian matchotatna man·aha.
“A·dokni gipin biaprango gita ong·gija Tura-ode maming neng·nikani grian CUET porikkako ong·atna man·aha aro ia porikkako chu·sokgipa ong·atna pilakan gisiko nangbee kamrangko ka·tokaha,” ine National Testing Agency (NTA)-ni City Coordinator aro Tura Don Bosco College-ni Principal Fr Bivan Rodriques Mukhim parakataha.
Ia chang CUET porikkako Garo Hills-oniba sak 5000-na baten chatro chatrirang setokaha aro ianoni sak 2000-na baten Tura-ni Don Bosco College centre-o setokahachim.
Shillong songjinmani NEHU centre-o CUET porikkako segiparang neng·nikanirangko chagrongna nangtokahani gimin adita salrangna skangsan a·dokni Education Minister Rakkam A Sangma, iani bidingo NTA-na sedoatenba, CUET porikkako ong·atpiltaichina ba Meghalaya a·dokko CUET-oniko watsrangchina didiatgen ine parakatahachim.
