TURA: Garo Hills-ni bang·a biaprangon Jal Jeevan Mission (JJM)-ni kamrangna suk ong·gijaniko paraktokengon, Dadenggre Civil Sub-Division-ni ning·o donggipa Romgre songoba, kamrangko name ka·jahani a·sel ia project-ni dam pakgni dake be·gruaha ine Garo Students Union (GSU) Chibinang regional unit matnangataha.
GSU Chibinang unit-ni parakatani gitade, ia jolrango songdongenggipa manderangni badi ka·anirangko man·soani ja·man ia songona re·ange nieon, kamrangko name ka·jani a·selsa ia dam be·gruaha ine nikna man·aha.
JJM dashboard-o parakani gitade, ia songo JJM-chi komibeoba 249 nokdangrang namgnirangko man·ani ong·achim aro ia 249 nokdangrangoni 219 nokdangrangnade chi pipe-rangko sale on·ahani gimin da·o 30 nokdangrangnasan chi pipe-rangko sale on·na nangaiahachim.
Indake ong·genchimoba, ia nokdangrangoni ge·saba da·ona kingkingan chi pipe sale on·aniko nikna man·kuja indide banoni 219 nokdangrangna chi pipe-rangko sale on·skaaha ine GSU Chibinang unit sing·doatskaaha.
Ia songni JJM project-na gong kror 50 batpile chamaha aro ia gong kror 50-oni gong kror 44-na batpilen maming kamrangko ka·gija contractor, tangkarangko oke ra·aha ineba GSU Chibinang unit-ni president Amit Marak matnangataha.
“Ia dam maini a·sel be·gruaha, iako department-ni gita inquiry dakna nangchongmota. Chingni nangnikanide, ia project-ni ning·o songni manderangna chirangko sokate on·na nanga. Da·ororo Garo Hills-o mikka jime waaba dongkuja indide ia dam maini a·sel be·gruna nangaha?” ine GSU Chibinang unit-ni president sing·doataha.
