SHILLONG: Shillong songjinmani Lum Survey-o niam gri songdongenggipa manderangko a·rikgalchina gita East Khasi Hills a·jani District Administration-na antigni somoiko on·ahaoba maming ja·kurangko de·jahani gimin Bristibar salo, Hynniewtrep Youth Council (HYC)-ni membor-rang, ia biapo niam gri rikgipa nokrangko pe·e galenba, niam gri songdongenggipa manderangko a·rikgalataha.
HYC-ni president Roy Kupar Synrem-ni kobor ra·timgipa manderangna parakatani gitade, ia a·ara Guwahati-o donggipa Defence Estate Office-ni a·arangsa ong·achim aro ia biapo niam gri songdongenggipa manderangko a·rikgalchina gita uamang East Khasi Hills District Administration-na antigni somoiko on·ahachim.
“District Administration-na antigni somoi on·ani bon·ahani gimin chinga da·alo an·tangtangan ia biapo niam gri songdongenggipa manderangko a·rikgalatna re·baaha. Chingni on·gipa antignini gisepo ia biapo niam gri songdongenggipa manderangko a·rikgalani bidingo Deputy Commissioner-ni u·iatanina chinga sengahachim indiba da·alona kingkingan ua chingna mamingkoba u·iatpila dongjaha. Ia biapo niam gri drugs ba pekatgipa samrangko badingenggipa manderangba ia biapona re·bapilaha ine chinga koborrangko man·soahani gimin chinga ta·raken ia biapo niam gri songdongenggipa manderangko a·rikgalatna nangnikaha,” ine Synrem aganaha.
Ia biapo niam gri songdongenggipa manderangko, uamangni nokrangko pe·galna skangan, an·tangtangni bosturangko ra·e ia biaponi re·angchina mol·molaha ineba HYC-ni president parakataha.
“Nokrangko pe·e galna gita JCB bolsako ra·baahachim indiba ia biapo niam gri songdongenggipa manderangko a·rikgalanio maming neng·nikanirangko man·jahani gimin chinga JCB-ko jakkalna gita nangjaha. Indake ong·genchimoba, ia manderang ia biaponan re·bapilgenchimode ba sorkari uamangna ia biapo dongna permission-ko on·genchimode chinga da·o changgipinode JCB bolbri bolbongako ra·bae, ia biapo songdongenggipa pilakkon a·rikgalatgen,” ine Synrem parakataha.
HYC president-ni aganani gitade, ia biapo niam gri songdongenggiparangko a·rikgaleani somoio gimik te 80 ba 90 nokdangrangoni 50 percent-de nokrangko chipe dontokachim.
Iandake a·doko niam gri songdong a·chaenggiparangko a·rikgalaniara sorkarini daitosa ong·achim indiba da·alo uamang an·tangtangsa ia kamko ka·na nangaha ineba ua an·tangni suk ong·gijaniko parakataha.
