TURA: Khasi Hills Autonomous District Council (KHADC)-ni ning·o songdongenggipa manderang Scheduled Tribe (ST) certificate-ko ra·na gita Khasi Tribe certificate-ko nangtelgnok ine a·dokni Cabinet Minister Paul Lyngdoh aganahani gimin Garo National Council (GNC) raken jegalataha.
KHADC-ni ning·o songdongenggipa manderang ST certificate-ko ra·na gita Khasirangni certificate-ko nangtelgnok ine Cabinet Minister-ni parakataniko jegalatengon, ia niamara Khasi Hills-o songdongenggipa gipin jatrang, mongsongbate A·chikrangna namen neng·nikani ong·gnok ine GNC-ni general secretary Augustine R Marak parakataha.
“Iandakgipa niamko tarianiara Khasi Hills-o songdongenggipa gipin jatrangna, mongsongbate A·chikrangna namen neng·nikani ong·gnok. KHADC-ni ning·o iandakgipa niamko tarianiara Khasi Hills-o ST-ni gadangko man·paenggipa gipin jatrangkode a·rikgalgnok ine mesokanisa ong·enga. Meghalaya a·doko Garorangba mongsonggipa jatgittimoni dolsa ong·paengon maini gimin Khasi ong·gijagipa jatrangara ST certificate-na Khasi Tribe certificate-ko nangskagen?” ine Marak sing·doataha.
Khasi Hills-o ST certificate-ko ra·na gita gipin jatrangba Khasi ong·na nanggenma ine sing·doatskaengon, “Ian ong·na amgijagipa niamsa ong·a aro ia niamko maming dakeba ja·rikna man·jawa. Chinga GNC ia niamko maming dakeba ra·chakna man·jawa aro Meghalaya sorkarikoba ia niamko ra·chakjachina mol·molatenga,” ine GNC-ni general secretary parakataha.