TURA: Ia 2024 bilsini Secondary School Leaving Certificate (SSLC) ba Matric porikkani result-ko Sukrobar salo parakataha aro ia chango Garo Hills-o pass ka·ani percentage 36% gapnasie re·anggipa bilsiona bang·gija namkalbatahaoba a·dokni gipin biaprang baksa tosusagenchimode bang·en namdapatna nanganiko nikna man·engkua.
Ia bilsini SSLC porikkao Garo Hills-oni gimik saksku chatro chatrirang, Top 20-o biapko man·e chu·sokna man·ahaoba, pass ka·aniko niatskagenchimode namen komikuenga ine nikna man·a.
Garo Hills-o lekka porani gita tang·dona man·jaenganiko name am·sandie nigenchimode bang·en a·selrangko nikna man·gen aro ia a·selrangoni mingsade Primary skulrango poraibachenganian ong·a.
Garo Hills-ni kona noksikbrion da·o an·chingo primary skulrangde dongtokaha indiba bang·bata skulrangon skigiparangni chu·onggijani, skul nok donggijani aro bi·sarangko skul re·na didianirang dongjani a·selba namgipa lekka poraniko man·bajaenga ine nikna man·gen.
Garo Hills-o Education official-rangni skulrangko re·e nijringjaengani a·selba mitam skulrango class ra·anirang aro skigiparangni skulchi re·anirang tik ong·jaenga ine nikna man·a. Khasi-Jaintia Hills a·jarangode education official-rang skulrangko somoi gita re·e nijringengani a·selan chatro chatrirangni name pass ka·anirangko nikna man·enga indiba Garo Hills-ode iandake education official-rangni somoi gita re·e nianirang dongjani a·selan skulrango skigiparang aro bi·sarangba gisik nanggijanirangko nikna man·engkua.
Garo Hills-o songadam nokadamrang baksa jillarangko tosusae nigenchimode songadam nokadamrango, mongsongbate a·kawe jolrango lekka porani gita namen ja·manchakbatenganiko nikna man·gen maina Tura, Phulbari, Dalu, Baghmara, Dadenggre, Williamnagar, Resubelpara, Mendipathar, Ampati aro uandakgipa jillarangode result-rang namkalbatengako nikna man·enga.
Iandake songadam nokadamrangona bate jillarango lekka poranirang nambatenganiara sorkari skulrangna bate private skulrangni bang·bataniko mesokani ong·a maina batanggimin bilsi 10-ni gisepo Garo Hills-o nambate pass ka·gipa chatro chatrirang bang·batan jillarangoni aro private skulrangonisa ong·a.
Garo Hills-ni bang·bata sorkari skulrangon Science laboratory-rang dongjani a·selba chatro chatrirang, porikkarango chu·sokna man·tokjaenga.
Skigipa saksani aganani gitade, theory ba ku·sikchi skie on·aniko ja·rikana bate chatro chatrirang practical ba jaktangchi dake nianichisa lesson-rangko ma·sibataha aro iana skulrango Science laboratory-rang dongna nangchongmota.
“Bang·bata skulrangon science laboratory-rang dongjani a·sel chatro chatrirang lesson-rangko ma·sitokja aro iani a·selan chatro chatrirang, Science aro Mathematics subject-rango chu·sokna man·rongja,” ine ua aganaha.
