TURA: Garo Hills Autonomous District Council (GHADC)-ni dingtang dingtang anti aro bazar-rango dokkan dakgiparangna biaptangtangni market committee-rangsa biaprangko sualahani a·sel GHADC-na maming kajina man·pilanirang dongjaenga ine A·chik Youth Council (AYC) parakatenba, ia anti aro bazar-rango dokkan dakgiparangko GHADC-ni gita nipiltaienba gital dake biaprangko suale on·piltaichina GHADC-ni dilgiparangko didiataha.
Iani bidingo GHADC-ni Executive Membor (EM) Haat/Bazar In-charge-na badi ka·e sedoatengon, GHADC-ni ning·o donggipa bazar-rango dokkan dakenggiparangna GHADC-ni sanction gri, bazar-tangtangni committee-rangsa biaprangko suale on·aha aro ia dokkan nokgiparang GHADC-na kajinarangko on·gija bading chiwale cha·tokenga ine AYC-ni general secretary Maxbirth Gabil Momin parakataha.
“Bazar-rango dokkan dakgiparangna GHADC-na biaprangko suale on·na bilrang donga indiba Garo Hills-ni bang·bata biaprangon dokkan dake cha·enggiparangna GHADC-ni sanction gri bazaar committee-rangsa biaprangko sualtokskaenga. Bazar committee-rangni iandake bilko jakkalaniara niamni a·palo ong·enga aro GHADC-kon re·badea gita ong·enga. Iani a·selan dokkan dakgiparang GHADC-na maming kajinarangko on·pilani gri ia biaprangko a·kangenba bading chiwale cha·tokenga,” ine Momin parakataha.
Indake ong·engon, GHADC-ni sanction ka·gijagipa dokkanrangna on·gipa a·arangko den·galpilenba, niam gita ia dokkanrangna gital dake biaprangko sualpiltaichina AYC, GHADC-ni EM Haat/Bazar I/c-ko didiataha.
GHADC-na noksan ong·ani dongjana gita aro pilak dokkan nokgiparangan kajinarangko gamchina gita dingtangmancha niamko ra·gatchina gitaba AYC-ni general secretary didiataha.
