TURA: Garo Hills-ni badiaba badiaba biaprango gipin biaprangoni Non-Tribal ba gipin jatrang re·bae, Trading Licence aro uandakgipa nangchongmotgipa lekka gri bading chiwale cha·engani gimin Bristibar salo Garo Hills Autonomous District Council (GHADC)-ni dilgiparang, dingtang dingtang official-rang baksa North Garo Hills a·jani Kharkutta, Kosi aro Bajengdoba bazar-rango dokkan dakenggipa aro bading chiwale cha·enggipa manderangni lekkarangko am·sandiangaha.
Ia am·sandianiko GHADC-ni Chief Executive Membor (CEM) Albinush R Marak aro De CEM Nikman Ch Marak-ni dilanichi dakangaha aro ia am·sandianio Executive Membor (EM) I/c Haat Dormonath Sangma, EM I/c Civil Works Nathawal S Marak, Dy Chairman Crozier Momin, Cotton Growers Association-ni Chairman Aldo A Sangma, Joint Secretary PR Marak, Revenue Officer B Ch Momin aro Taxation Officer-rangba dongpaaha.
“A·chik a·songo gipin biaprangoni bading chiwalgiparang re·bae salantian bading chiwale cha·enga aro uamangni bading chiwalanio Garo Hills-o songdongenggipa manderangna maming neng·nikanirangko ra·bana man·jana gita chinga uamangoniko TNT licence aro gipin nangchongmotgipa lekkarangko am·sandienba, dongimin niamrangko ja·rikesa Garo Hills-o bading chiwale cha·china ku·pattianirangko on·angaha,” ine ia biaprango bading chiwalgiparangko am·sandiangani ja·man GHADC-ni CEM Albinush R Marak parakataha.
