MALLANGKONA: West Khasi Hills a·jani Nonglang sordarship-ni ning·o donggipa Chual Napram ba Werang A·bri jolrangoniko rong·silgrak (iron ore) bikotna gita dolsa company-ni manderang, a·brirangko cho·na a·bachengengahani gimin Mallangkona jolo songdongenggipa manderang raken jegalattokaha.
Mallangkona jolo songdongenggipa manderangni parakatani gitade, adita salrangna skang ia company-ni manderang, songona re·angenba, ia songoniko rong·silgrak bikotna permission man·aha ine songni manderangna aganeaha. Uni ja·man songni manderang, dingtang dingtang dolrang baksa ia biapona re·ange nion, uamang dal·dalgipa ostrorangchi a·a cho·anikosa nikna man·eaha. Songni manderang, re·anggipa May-ni 23 tarikoba ia biapona re·ange nietaiaha aro songni manderangonikode permission ra·jahani gimin ia songo rong·silgrak bikotna a·a cho·aniko dontongchina uamang company-ni manderangko mol·moleaha.
Ia manderangni a·a cho·enggipa biapara ia jolrango donggipa dam 24 songrangna chirangko on·enggipa bisik sambaon ong·ani gimin ian ia songrangna nangchakeaniko ra·bagen ine songni manderang, a·a cho·aniko dontongchina mol·molahachim.
“Ia jolo donggipa song damsani sordar Madan Jira-na agrede pilak songni dilgiparangan ia company-na a·a cho·na gita permission-ko on·jahachim. Uni gimin chinga ia biapo a·a cho·aniko dontongchina uamangko mol·molaha,” ine songni saksa Enos G Momin, kobor ra·timgiparangna parakataha.
Jolo songdongenggipa manderangni parakatani gitade, ia biapona uamang re·ange nion, ia company-ni manderang, komibeoba metre 57-mangni gitade a·ako cho·manaha aro a·kol ge·antion dal·dalgipa bakosrangko tekaha ine uamang nikna man·aha.
Iani bidingo sing·sandion, uamang permission-kode man·aha ine aganaha indiba lekkarangkode a·bachengo mesokna man·jae, uamang salgipin pilak lekkarangko ra·e re·bapilna ku·rachakaha ineba songni manderang parakataha.
Uandaken May-ni 27 tarik Sombar salo, dam 24 songni manderang, Mallangkona songo company-ni manderang baksa iani bidingo agangrikna tom·aniko ong·ataha aro ia tom·anio songni manderang pilakan, ia biaponiko rong·silgrak bikotna a·a cho·aniko raken jegaltokaha ine songni manderang u·iataha.
Ja·mano ia company-ni manderang, songni manderangna licence-rangko mesokaha, jeon uamang bilsi 50-na mining ba a·a cho·ani licence dongachim.
“Uamang ching joloniko bilsi 50-na a·a cho·angkua ong·ode chingade janggi tangnan chol ong·jawaha. Uamang indake a·arangko cho·angkua ong·ode ia songrango donggipa chibisikrang pilakan bon·tokgnok indide chingni dedrangrangara mikkangchi maikai janggi tangangkuna man·gen? Uamang chingna jegita on·pilgenchimoba chingni a·arang aro chibisikrangko gimaatahaode chinga maikai janggi tangna man·kugen?” Ine ia tom·anio dongpae bak ra·anggipa GSU Aradonga unit-ni membor-rang sing·doataha.
Indake ong·engon, songni manderang iandake jegalgrimtokahani gimin ia company-ni manderang, mikkangchi jeko dakgenchimoba songni manderang baksa agangrikchengesa dakgen aro songni manderang jegalkuaigenchimode kamrangko dontongataigen ine ku·rachakaniko on·angskaaha.
Ia songoniko rong·silgrak bikotna a·a cho·aniko Mallangkona Area Development Organisation, Mallangkona Youth Multipurpose Society aro gipin dolrangba raken jegalataha aro iani bidingo a·dokni Chief Minister aro dingtang dingtang department-rangna badi ka·e sedoatna gita tik ka·angtokaha.