TURA/SHILLONG: ‘Remal’ balminduri balanganichi Meghalaya a·dokoba bang·en nangchakeanirangko man·angaha aro biap damsao nok te·sa be·gruenba mande saksa janggitangko gimaatna nangaha.
Koborko man·soani gitade, Sombar walo, East Jaintia Hills a·jani Wapung C&RD Block ning·o donggipa Sutnga Weilong songo, mikka balwa ta·rakangenba, nok te·sa be·gruaha aro ia nok be·gruanio bilsi 26 ong·gipa mande saksa janggitangko gimaatna nangaha aro gipin sakgni manderangba saknaanirangko man·na nangaha.
Garo Hills-oba mikka balwa ta·rakanganichi, bang·en a·a ruronganirangko, bol be·anirangko aro dingtang dingtang dake a·sel ong·anirangko knasona man·aha aro Garo Hills gimikon Sombar attamonin bijoli dongjae, andalmin·dik dongna gita nangtokaha.
Garo Hills-ni bang·a biaprangon bijoli silitingrang chotahani a·sel bijoliko on·na man·pilkujaenga aro ia koborko seatengmiting somoiona kingkingan MeECL-o kam ka·enggipa manderang, Garo Hills-ni dingtang dingtang biaprango bijolirangko taripilna gita rakbee kamrangko ka·tokkuenga.
Sombar walo, mikka balwa ta·rakanganichi bang·en bol wa·arang be·na nangahani gimin Mongolbar pringonin dingtang dingtang department-ni manderang, songni nokni manderang baksa ramarango aro nokrango be·dapgipa bolrangko den·e galna rakbee kamrangko ka·tokaha.
Koborko man·soani gitade, Mawkynroh Bypass-oba Mongolbar pringwalni 4:00 bajimango a·a rurongaha aro ia a·a ruronganio mande sakbri saknaanirangko man·ahani gimin uamangko sanna gita NEIGRIHMS-ona ra·angaha.
Shillong-oni Guwahati-ona dakanggipa National Highway (NH-6) ramaoba bang·en a·a ruronganirangko kobor man·soaha indiba Nongpoh police station-ni sipairang, National Highway Authority of India (NHAI)-ni manderang baksa gari gorarang re·rurana man·na gita ta·raken a·arangko galaha.
West Khasi Hills a·jaoba Kynshi chibima rang·san ditdobae, chibima samba jolrango donggipa songrango aditan chirang bananiko nikna man·angaha ine kobor on·aha.
‘Remal’ balminduri balanio saksa sia, bang·en saknaanirangko man·a
Date:
Share post:
