SHILLONG: Umiam Dam-ko taridapani kamrang, July jani bon·angachibara, ong·jaode August jani a·bachengachibara matchotnaba gnang ine sorkari u·iataha.
A·dokni Power Minister AT Mondal-ni parakatani gitade, Umiam Dam gitan Myntdu-Leshka aro Umtrew dam-rangkoba sorkari taridapna a·bachengataha.
Umiam Dam-ko June jani gisepon matchotatna sorkari krengahachim ine janapatengon, dingtang dingtang matchotkugijagipa kamrang dongkuengani a·sel salrangko ra·dapna nangao ga·akaha ine Power Minister parakataha.
Iana komibeoba sal 28-ko ra·dapna nangaha ineba ua aganaha.
Umiam dam-ko re·anggipa December jaon taridapna a·bachengatahachim aro iani a·selan ia dolong gita re·ruraenggipa garirang kontagnimang ong·pile apchangket ong·na nange neng·nikanirangko chagrongna nangtokengachim ine nikna man·a.
Indake ong·engon, ia Umiam Dam-ko taridapani kamrang July bon·angachibara, ong·jaode August jani a·bachengachibara matchotgnok ine Mondal, an·tangni ka·dongchakenganiko parakatenba, ia ramao garirangni re·ruraanirangkoba department nirokjringenga ine talataniko on·angaha.
Ia ramao VIP-rang, police-rang aro uandakgipa sipai dolrangni overtake ka·e salengani gimin sing·skaon, iani bidingo pilakkon apsan niamko ja·rikchina mol·molahachim indiba basakobade kam nangchongmotanikoba nirokna nangaia ine Power Minister parakataha.
Ia sal somoirango mikkarang waahani gimin Meghalaya a·doko bijoliko chu·onga gita man·enga ineba Power Minister parakataha.
