SHILLONG: Re·baenggipa June-ni 4 tariko Lok Sabha election-ni vote-rangko chanani somoio East Khasi Hills a·ja gimikon Section 144 CrPC-ko ra·gatna gita District Administration-ni tik ka·aniko ra·galpilchina Hynniewtrep Integrated Territorial Organisation (HITO) dabiangaha.
Lok Sabha election-ni counting ba chananiko re·baenggipa June 4 tariko dakna siengani gimin ua somoio manderang bang·e dongpaaniko komiatna Section 144 CrPC-ko ra·gatgen aro counting matchotani ja·man chegipa dolrangkoba jinma re·jomna on·jawa ine adita salrangna skangsan, Shillong Parliamentary Constituency-ni Returning Officer aro East Khasi Hills a·jani Deputy Commissioner SC Sadhu parakatahachim.
Counting centre-o maming so·sojengjeng ong·ani ba golmal gondogol ong·anirang dongjana gita District Administration, video surveillance gita centre-ni wilwilao donggipa pilak biaprangkon mikrake nirikkigen ineba Sadhu parakatahachim.
Deputy Commissioner-ni parakatani gitade, manderangna kakket result-rangko mesoke on·na man·na gita Information & Public Relations department, Shillong songjinmani dingtang dingtang biaprango screen-rangko dongen aro ia screen-rango election-ni result-rangko manderangna mesokatna siengachim.
Indake ong·engon, election result-ni salo iandake East Khasi Hills a·ja gimiko Section 144 CrPC-ko ra·gatna District Administration-ni tik ka·aniko HITO jegalatskaenba, ian Indian Constitution-ni Article 14 aro 19-ni ning·o manderangna on·gimin bilrangko pe·ani gita ong·enga ine parakataha.
“Election result-ni salo jinma re·jomani aro tom·dakanirangko champengna a·ja gimiko Section 144 CrPC-ko ra·gatgen ine parakataniara namen kragijani aro ra·chakna man·gijani ong·enga. Iako ra·gatna skang District Administration, a·jao songdongenggipa manderang baksa chanchirimchenggija iako dakna tik ka·aha aro ian a·jao songdongenggipa manderangna neng·nikaniko ra·baani gitasan ong·enga,” ine HITO-ni president Donbok Dkhar, East Khasi Hills a·jani Deputy Commissioner SC Sadhu-na sedoatgipa chittio janapataha.
