SHILLONG: Re·anggipa Sombar wal aro Mongolbar pringo, Meghalaya a·dokoba ‘Remal’ balminduri balanganichi nok-jamrangko, bagan barirangko aro ma·manti gam-jinrangko gimaatna nanggipa nokdangrangna dakchakanirangko on·na gita a·dok sorkari, gong kror 19.85 tangkarangko pilak a·jani deputy commissioner-rangna chame on·ataha.
Remal balminduri balanganichi East Jaintia Hills a·jao mande saksa siangna gita nangahachim aro sakbonga manderang saknaanirangko man·e, komibeoba te 903 nokrang nosto ka·ako man·aha aro dam 271 songrango songdongenggipa sak 5,169-mangni gita nangchakeanirangko man·na nangahachim.
Iani bidingo kobor ra·timgiparangna talataniko on·angengon, Remal balminduri balanganichi a·doko nok-jam aro manderangni nangchakeaniko man·batgipa biaprangde Eastern West Khasi Hills aro West Garo Hills a·jarang ong·aha ine Budbar salo, a·dokni Disaster Management Minister Kyrmen Shylla parakataha.
Ian Budbar pring 11:00 bajiona man·sogipa report-ni gita ong·enga ineba ua aganaha.
Tangka paisani gita noksan ong·aniko da·o dipet hisapkuenga ine talataniko on·angengon, dingtang dingtang a·jarango neng·nikanirangko chagrongna nanggipa manderangna dakchakanirangko on·na gita dingtang dingtang a·jarangna gimik gong kror 19.85-ko chame on·ataha ine Minister parakataha.
“Eastern West Khasi Hills a·jao sak 1243 manderang, damsni songrang aro nok te·gittam nangchakeaniko man·aha aro unbaksana rama jal·langrang aro bijoli krongrangba nosto ka·ako man·aha. East Khasi Hills-o mande sakchet, song dambri aro nok te·gni nangchakeaniko man·skaaha. West Garo Hills a·jaoba sak 761 manderang, dam 72 songrang aro te 761 nokrang nangchakeaniko man·skaaha. North Garo Hills aro South Garo Hills a·jaoba rama jal·langrang, bijoli krongrang aro bolrang nosto ka·ako man·skaaha. South West Garo Hills a·jaode May 26 tarikonin bijoliko man·chipkujaenga aro bijoliko on·pilna gita Power department raken kamrangko ka·enga,” ine Shylla parakataha.
West Jaintia Hills a·jaoba bolrang aro a·arang be·an baksana nok te·sa nosto ka·ako man·aha ine janapatskaengon, East Jaintia Hills a·jani Wapung C&RD Block ning·oba bolrang pangpikako man·aha aro mande saksa janggiko gimaatna nangaha ine Disaster Management Minister parakataha.
Sianggipa mandeni nokdangna sorkari tangka paisarangko gamskagen ineba ua aganaha.
