TURA: West Garo Hills a·jani Silkata songo donggipa Atimullah Memorial Secondary School-ni School Managing Committee (SMC)-ko songni manderang baksa tom·e chanchirima grisa songaha ine songni mitam manderang matnangatenba, ia SMC-ko den·galpilchina West Garo Hills a·jani Deputy Commissioner-ko didiataha.
Ia manderangni Deputy Commissioner-na badi ka·doangani gitade, songni saksa Hazifur Rahman minggipa mandesa, songni manderang baksa tom·aniko ong·atgija manderangni soirangko tol·e ra·enba, SMC-ko songaha ine West Garo Hills a·jani District School Education Officer (DSEO)-na pilak lekkarangkon on·eaha indiba kakketode ia SMC-ko songanio ua songni manderang baksa tom·aniko ong·ata dongjachim.
Skulni headmistress-cum-secretary, ex-officio, nominate ka·a man·gipa membor-rang aro SMC-ni president pilakan Hazifur Rahman-ni manderangsa ong·a ine matnangatengon, ia manderang bang·batan skia pora donggijagiparangsa ong·e skulni SMC-ko chalaina kragiparang ong·ja aro SMC-ko chalaina gita songo skia pora man·batgipa manderang bang·en donga ine Deputy Commissioner-na badi ka·doanggipa Shahjamal Sheikh aro gipinrang parakataha.
Niam gitade, skulni headmaster ba headmistress-ni kamko jako ra·na gita B.Ed pass ka·gipa ong·na nanga ine janapatskaengon, ia skulni headmistress-na seokako man·gipa me·chikara Hazifur Rahman-ni jikgipasa ong·a aro ua B.A-ko pass ka·gipasan ong·aia ine ia manderang, Deputy Commissioner-na badi ka·doangaha.
Ia SMC-ko den·galpilenba gital SMC-ko songna Deputy Commissioner-ko mol·molatengon, tol·gipa lekkarangko tarie SMC-ko bikotdraahani gimin Hazifur Rahman-ni kosako FIR ka·china gitaba ia manderang, Deputy Commissioner-ko didiataha.
