SHILLONG: Bristibar pringchibara, East Khasi Hills a·jani Shella Block ning·o donggipa Nongpriang songo, mikkarang jimbee waangani ja·man nok te·gniko a·a rurongdapaha aro ia a·sel ong·anio mande sakbri siaha indiba sakgittamni manggisikode man·kujaenga ine kobor on·aha.
Koborko on·ani gitade, a·a rurongdapa man·e sianggipa mandeara bilsi 75 ong·gipa Phisar Nongrum ong·achim aro gimakuenggipa manderangara, bilsi 70 ong·gipa Kynnaw Syngai, bilsi 60 ong·gipa Benti Riahtam aro bilsi 16 ong·gipa Lumlang Riahtam ong·achim.
Gimaenggipa manderangko sandina Shillong-ni Fire & Emergency Response Team baksana Search & Rescue Team-ko watataha aro ia koborko seatengmiting somoiona kingkinga uamang, gimaenggipa manderangko man·pilkujaengachim.
Ia a·selni bidingo sing·sandiaton, da·o dipet saksani manggisikosan man·engkua indiba sakgittamni manggisikode man·kujaenga ine Sohra Civil Division-ni SDO Sonali Verma parakataha.
Verma-ni u·iatani gitade, ia sakgittamoni saksani manggisikoba nikahachim indiba ian dal·begipa ro·ongsa ong·ani gimin manggisiko ra·ongkatna man·kujaengachim. Ia manggisiko Sukrobar pringo ra·ongkatna jotton ka·skagen ineba SDO parakataha.
Ia songara namen chubegipa a·silangosa ong·ani gimin manggisirangko sandienggipa manderang neng·nikanirangko chagrongna nangenga ineba Verma parakataha.
Ia songona ja·achin kontagnimang re·na nanga aro ia songo mobile network-ko man·jani a·sel kobor ra·grikanioba neng·nikanirangko chagrongna nangenga ine Verma parakataha.
Re·anggipa Sombar attamonin Remal balminduri balani a·sel a·dokni dingtang dingtang biaprango a·a be·anirangko aro nokrango bol be·dapanirangko bang·en knasona gita man·engachim.
Re·anggipa Sombar waloba, East Jaintia Hills a·jani Wapung C&RD Block ning·o donggipa Sutnga Weilong songo, mikka balwa ta·rakangenba, nok te·sa be·gruaha aro ia nok be·gruanio bilsi 26 ong·gipa mande saksa janggitangko gimaatna nangaha aro gipin sakgni manderangba saknaanirangko man·na nangahachim.
Koborko man·soani gitade, Mawkynroh Bypass-oba Mongolbar pringwalni 4:00 bajimango a·a rurongaha aro ia a·a ruronganio mande sakbri saknaanirangko man·ahani gimin uamangko sanna gita NEIGRIHMS-ona ra·angaha.