SHILLONG: Adita salrangna skang, Meghalaya a·dokoba Remal balminduri balanganichi bang·a biaprangon nangchakeanirangko man·na nangahani gimin baditana kingking nok-jamrang nosto ka·ako man·aha aro badita sak manderang neng·nikanirangko chagrongna nangaha, uarangko nipilna gita Sukrobar salo, a·dokni Revenue & Disaster Management Minister Kyrmen Shylla, dingtang dingtang department-ni official-rang baksa tom·aniko ong·atangaha aro ia tom·anio Revenue & Disaster Management department-ni Commissioner & Secretary Sanjay Goyal, Secretary M War Nongbri, State Disaster Management Authority (SDMA)-ni official-rang aro gipin official-rangba bak ra·angaha.
Remal balminduri balanio, a·a be·anirangchi aro bolrang be·dapanirangchi manderang baditana kingking noksan ong·na nangaha, uarangni bidingo Minister, dingtang dingtang official-rang baksa agangrikangaha.
A·arang ruronganichi nokrang, rama jal·langrang bang·en nosto ka·ako man·na nangahani giminba ia tom·anio jinma chanchirimangaha aro nosto ka·a man·gipa nok-jamrang aro rama jal·langrangko taripilani giminba chanchirimangaha.
Remal balminduri balanichi nangchakea man·gipa biaprango SDMA, SDRF, Deputy Commissioner-rang, MeECL aro dingtang dingtang department-rangni kamrangkoba ia tom·anio mittelpilangaha.
Mikkangchi iandakgipa a·sel ong·anirango man·a dipet chel·chakanirangko on·na man·na gita tarisamsoanirangko dakchina gita Disaster Management Minister, dingtang dingtang official-rangko didiangaha.
Bristibar pringo, Nongpriang songo nok te·gniko a·a be·dapenba mande sakbri sina nangahani giminba ia tom·anio jinma chanchirimangaha aro Minister an·tangan Sonibar salo, ia songona re·ange nigen ine parakataha.
