SHILLONG: Re·anggipa Bristibar pringo, East Khasi Hills a·jani Shella Block ning·o donggipa Nongpriang songo nok te·gniko a·a be·dapani a·sel sianggipa mande sakbrini manggisirangkon man·aha ine kobor on·aha.
Sianggipa mande sakbrioni saksa, bilsi 75 ong·gipa Phisar Nongrum-ni manggisikode Bristibar salon man·ahachim indiba uamangoni sakgittamni manggisikode man·pilkujaengachim.
Ia sakgittam manderangni bimingrangara, bilsi 70 ong·gipa Kynnaw Syngai, bilsi 60 ong·gipa Benti Riahtam aro bilsi 16 ong·gipa Lumlang Riahtam ong·achim.
Indake ong·engon, a·a dapa man·e sigipa mande sakgittamni manggisirangkoba Sukrobar salo, Fire & Emergency Response Team baksana Search & Rescue Team-ni manderang man·aha ine kobor on·timgiparang parakataha.
Sianggipa manderangni nokdangrangna sorkari, sakprako gong lak 4 ka·e on·gen ine East Khasi Hills a·jani Deputy Commissioner SC Sadhu parakataha.
Official-rangni u·iatani gitade, ia songara namen chubegipa a·silangosa ong·ani gimin manggisirangko sandianio neng·nikanirangko chagrongna nangahachim aro ia songo mobile network-ko man·jani a·sel kobor ra·grikanioba neng·nikanirangko chagrongna nangahachim.
