Stadium-ko rikenggipa company-oniko sorkari report bi·ata
SHILLONG: Sonibar walo, Tura-o mikkarang jimbee waangani ja·man gital rikenggipa PA Sangma Stadium-ni janggilchipak pakmarang be·wakangtaiaha aro iani bidingo a·dok sorkari, ia sports complex-ko rikenggipa Hindustan Steelworks Construction Limited (HSCL)-oniko report bi·ataha.
Sports & Youth Affairs department-ni Director Isawanda Laloo-ni kobor ra·timgiparangna parakatani gitade, PA Sangma Sports Complex-ni Sewage Treatment Plant aro Indoor Hall-2-ni sambao gital rikenggipa boundary wall, Robibar pringwalo be·wakangaha indiba ia pakma be·anio stadium-ni mongsonggipa bakrangnade maming nangchakeani dongjaha.
Ia chu·gimik sports complex-ko rikenggipa HSCL company-oniko sorkari report-ko bi·ataha ine janapatengon, mikkarang jimbee waangani a·sel ia biapo tarigipa nalarango chirang sikkonge dongaha aro uandaken chirang sikkongahani a·selsa ia pakma be·wakangaha ine Laloo parakataha.
Ia pakmako sima kapengna aro niam gri biap ra·sekaniko champengna gitasa niamna rikchengahachim ine janapatskaengon, ia stadium-ni wilwilao donggipa manderangna naljokaniko on·na gita West Garo Hills District Administration ja·kurangko de·chakataha ine Sports & Youth Affairs-ni Director parakataha.
Laloo-ni parakatani gitade, ia pakma be·anio nangchakeaniko man·gipa nokdangko dingtang biapona apjitataha aro ia nokdangna dongchakani baksana pilak nanga dakchakanirangko sorkari on·aha.
Ia pakma be·anichi champengate dongenggipa pipe-rangko PHE-ni manderang galeaha aro a·dubekrangkoba rongtalataha ine sorkari official parakataha.