TURA/SHILLONG: Lok Sabha election-ni result-rangko Mongolbar salo parakataha aro uandaken ia chang Tura Lok Sabha seat-ko Indian National Congress (INC)-ni Saleng A Sangma aro Shillong Lok Sabha seat-ko Voice of the People’s Party (VPP)-ni Ricky Andrew J Syngkon cheangaha.
Tura-o INC-ni candidate Saleng Sangma, 3,83,919 vote-rangko man·e changgittamna Tura-ni MP ong·anggipa Agatha K Sangma-ko 1,55,241 vote-rangchi cheangaha aro Shillong-o VPP-ni candidate Ricky Syngkon, 5,68,000 vote-rangko man·e changgittamna MP ong·anggipa aro INC-ni candidate Vincent H Pala-ko 3,71,910 vote-rangchi amchepatskaaha.
Tura-ni gitcham MP aro NPP-ni candidate Agatha K Sangma, 2,28,678 vote-rangko man·rikaiaha aro Shillong-ni gitcham MP aro INC-ni candidate Vincent H Pala-ba, 1,99,168 vote-rangkosan man·rikaiaha.
Tura Lok Sabha constituency-o susagipa gipin candidate-rangoni Trinamool Congress (TMC)-ni Zenith M Sangma 48,518 vote-rangko aro Independent candidate Labenn Ch Marak 6846 vote-rangkosan man·riktokaiaha.
Shillong Lok Sabha constituency-o gipin susagipa candidate-rangoni NPP-ni Ampareen Lyngdoh 1,86,488 vote-rangko, Regional Democratic Alliance (RDA)-ni Robertjune Kharjahrin 44563 vote-rangko, Independent candidate Lakhon Kma 18,582 vote-rangko aro sakgipin Independent candidate Peter Shallam 7024 vote-rangko man·rikskaaha.
Tura aro Shillong Lok Sabha constituency damgnio election-ko re·anggipa April jani 19 tarikon ong·atangahachim aro ia election-o a·dok gimikni register ka·gimin sak 22,26,567 voter-rangoni sak 16,42,761 voter-rang pu·onachi bak ra·angahachim.