SHILLONG: Da·ororo salantian dikdikprak bijoli sirongengani gimin manderang badi ka·dotokengon, adita salrangna skang, balminduri balanganichi nosto ka·a man·gipa line-rangko tarina gitasa bijoliko kimitna nangenga ine a·dokni Power Minister AT Mondal talataniko on·angaha.
Power Minister-ni aganani gitade, badiaba badiaba biaprango da·omangba bijoli line-rangko name tarina man·kujaengani giminsa ia nosto ong·gipa line-rangko tarina MeECL, bijoliko kimitna nangengachim.
Ian load shedding ka·enga ong·ja ine talataniko on·angengon, balminduri balanio nosto ong·gipa bijoli krongrangko songpilna, bijoli line-rangko tarina aro sub-station-rangko bilakbatatna gitasa bijoliko kimitna nangao ga·akenga ine Mondal aganaha.
Adita salrangna skang ‘Remal’ balminduri balanganio bang·en bijolirang nosto ka·ako man·na nangahachim aro nosto ong·gipa line-rangko da·o MeECL taripilna nangengahachim.
Da·o dipet Meghalaya a·doko bijoliko chu·onga gita man·enga aro load shedding-ko ka·na gita sorkari nangnika dongkujaenga ineba Power Minister parakataha.
“Ian Meghalaya a·doko bijolini gita namdapaniko mesokani ong·enga indiba MeECL chu·gimik dingtangataniko man·engama man·kujaenga ukode aganna man·kujaenga,” ine Mondal aganaha.
Umiam dam-ko taridapenggipani bidingo janapatskaengon, kamrangko July jani bon·anganichibara, ong·jaode August jani skanggipa antion matchotgen ine Power Minister agantaiaha.
 |
ReplyForward
|