TURA: Tura-ni Dakkopgre-o gital rikgipa PA Sangma Sports Complex-ni simako kadulgipa pakmarang da·o gnigipa changna be·wakangahani gimin ia stadium-ko rikani bidingo ta·raken inquiry-ko dakchina A·chik Conscious Holistically Integrated Krima (ACHIK) dol dabiangaha.
“Bilsisani gisepon ia stadium-ni pakmarang be·gruahani gimin ian ia stadium-ko rikanio sing·dona nanganirangko ong·kataha. Uni gimin ia stadium-ko rikani bidingo ta·raken inquiry-ko dakchina chinga dabienga,” ine ACHIK-ni dilgiparang parakataha.
ACHIK-ni president Thomas Marak-ni parakatani gitade, ia PA Sangma Sports Complex-ni mitam bakrangko 2022 bilsini December jaosan nokdonggaahachim indiba a·bachengonin ia stadium-ko rikanii chu·onggijanirangko nikna man·ahachim.
“Ia sports complex-ko gong kror 127.7 koros ong·e rikahaoba da·onan ia stadium-ko mangrake rikna man·kujaenga aro kamrang matchotgija bang·en dongkuenga. Ia stadium-ni pakmarang be·gruaniara manderangna naljokaniko on·na man·gijaniko mesokaniba ong·enga,” ine Marak parakataha.
Indake ong·engon, ia stadium-ko rikani bidingo ta·raken inquiry-ko dakchina aro mikkangchi iandakgipa a·selrang ong·taijana gita ja·kurangko de·china ACHIK dol, a·dok sorkariko didiataha.