Saleng, Vincent, Ronny CWC meeting-o bak ra·anga

New Delhi: Northeast ba salgro-salaram a·jolo mijaomangmang matchotanggipa Lok Sabha poll-o mongsongbate Manipur, Nagaland aro Meghalaya-o Congress nama result-ko man·aha. NDA-ni dilenggipa BJP-ni a·kanggipa seat-rangko Congress man·skaha, iani bidingo Sonibar salo CWC tom·anio chanchirimangaha.
Tom·anio aganprakataon party President Mr Mallikarjun Kharge, party-ni cheanina Bharat Jodo Yatra-ko de·mittelataha. Je je biaprangona yatra-ni gita sokaha, ua biaprango vote percentage-rang bariaha. Niatna gita Manipur-o Congress party ge·gni seat-ko man·aha, una agreba Nagaland, Assam aro Meghalaya-o Congress amaha, ine aganaha.
Bilsi 2019 Lok Sabha poll-o BJP aro unbaksa bakrimgiparang Northeast-o Assam aro Meghalaya-ko wate chegopahachim.
Congress-ni dilgipa Rahul Gandhi, uni Bharat Jodo Nyay Yatra (BJNY)-ko damsni Lok Sabha seat-oni damdok seat gita nappakaha, ua biaprango Congress cheaha. Ua constituency-rangara- Inner Manipur, Outer Manipur, Nagaland, Jorhat, Nagaon aro Dhubri ong··a. Congress dilgiparang January 14 tarikon March 16 tarikona ‘unity and justice’ ba apsan ku·cholsan aro kakket bichal ka·anina rally ka·angaha.
Uandake Kharge, party-ni election result skangna bate namdapani gimin janaptengon, ia changde bang·bate SC, ST, OCB aro minority voter-rangko bang·en man·aa ine parakaha. Indake mikkangchi nambatna jotton ka·kuangna nangenga ineba agankuaha.
CWC-ni palo Kharge, Lok Sabha-o seoka man·bagipa gital Congress memborrangna nama sikaniko on·aha.
Unbaksana Kharge, party-ni gitcham president Sonia Gandhi-koba election-ni kamrangko chu·gimik bak ra·anina mittelataha. Meeting-ona Mr Saleng Sangma, MPCC President Vincent Pala, CLP dilgipa Ronny Lyngdoh- uamangba bak ra·na sokangaha.
Congress-ni dal·dalgipa dilgiparang-  Sonia Gandhi, Priyanka Gandhi Vadra, aro gipinrangba bak ra·aha.