SHILLONG: National People’s Party (NPP)-chi dilenggipa Meghalaya Democratic Alliance (MDA) sorkari, a·doko songdongenggipa manderangni nangnikanirangko chu·sokatna man·jaenga ong·ode sorkariko chalaina gita cholko on·skana nanga ine Voice of the People’s Party (VPP) aganaha.
A·dokni dingtang dingtang nanganirangko Parliament-ona ra·ange ku·rang on·china gita adita salrangna skang NPP, gital seoka man·gipa VPP-ni MP-ko aganahani gimin ia kattarangko VPP aganskaaha.
VPP-ni president Ardent Miller Basaiawmoit-ni aganani gitade, NPP-chi dilenggipa MDA sorkari, an·tangtang kamrangko chu·sokatna man·jaengaha ine nikgenchimode sorkariko chalaichina VPP-na pakwate on·anian nambatgipa chol ong·engachim.
Changgittamna kingking Shillong-ni MP ong·anggipa Vincent H Pala, a·doko ILP-ko ra·gatchina gita ma·mong sorkariko didina man·jahani gimin da·o ia kamko chu·sokatanide VPP-ni MP Ricky AJ Syngkon-ni daito ong·skaengaha ine adita salrangna skangsan, NPP-ni dilgipa aro a·dokni Cabinet Minister Rakkam A Sangma aganahachim.
Iani bidingo NPP-chi dilenggipa MDA sorkariko matnangatengon, Khasi Hills Autonomous District Council (KHADC) aro Jaintia Hills Autonomous District Council (JHADC)-ni term-ko jadokna ra·dodadapatahani giminba VPP jegalataha.
KHADC aro JHADC damgnion VPP bilona re·bana kenchaksoesa sorkari, ia district council damgnini term-rangko ra·dodapataha ine Basaiawmoit parakataha.
District council election-o aro 2028 bilsini Assembly election-o VPP chegopna kenchaksoengani gimin KHADC aro JHADC-ni election-ko sorkari ong·atningjaenga ineba ua aganaha.
Shillong Parliamentary constituency-o VPP-ni candidate Ricky AJ Syngkon 3,71,910 vote-rangchi an·tangni sepangbatgipa bobilko cheahani gimin mittelpilani tom·aniko Sonibar salo, Smit songo ong·atangaha aro ia tom·anio hajalni hajal manderang bak ra·angtokahachim.
