SHILLONG: Ia chang Meghalaya a·doko chu·onga gitan mikkarang waengahani gimin aro a·bachengonin sorkari tarisamsoahani gimin ia bilsiode load shedding ba somoi gita bijoli kimitani dongjawa ine a·dokni Power department parakataha.
Batanggimin bilsirangode baditaba kontarangna load shedding-ko ka·ahani a·sel manderang neng·nikanirangko chagrongna nangtokahani gimin iandake Power department-ni parakataniara a·dokni manderangna rang·speaniko ra·baaha.
“Ia changode chinga a·bachengonin tarisamsoahani gimin ia bilside bijolini gita maming neng·nikanirangko man·jaenga. Da·o mikkarangba nanga gitan waengahani gimin ian chingna dakchakani gita ong·dapengaha,” ine a·dokni Power Minister AT Mondal parakataha.
Bijolirang sisimani a·sel manderangni neng·nikanirangko chagrongna nangani gimin janapatengon, adita salrangna skang, balminduri balanganichi nosto ka·a man·gipa line-rangko tarina gitasa bijoliko kimitna nangenga ine a·dokni Power Minister talataniko on·angaha.
“Maini gimin bijoliko kimitna nangenga manderang ma·sitokjaenga aro bijoli sion load shedding ka·enga inesa bang·bata manderangan chanchitokaia. Nosto ong·gipa line-rangko tarina gita bijoliko kimitchengna nangronga,” ine Mondal aganaha.
Power Minister-ni aganani gitade, mikkarang waon basakode mikka il·epa baksana balwarangba ta·raken balronga aro indakgipa obostang ong·on bijoliko kimitna nangao ga·akronga.
Unbaksana balwarang ta·rakon bijoli line-rango bolrang be·dapronga aro bijolirang nosto ong·atako man·ronga ineba ua talataniko on·angaha.
Indake ong·genchimoba, iandake bijoli nosto ong·anirangko Power department, ta·raken taripilna jotton ka·rongenga ine Mondal, manderangna ku·rachakaniko on·ataha.