TURA: South Garo Hills a·jao Rongara-Siju constituency-ni ning·o donggipa Rongsu A·gal songko sorkari nirok sandia dongjaengani a·sel songni nokni manderang neng·nikanirangko chagrongna nangtokenga ine songni manderang matnangattokaha.
Koborko on·ani gitade, da·alona kingkingan Rongsu A·gal songona gari re·na man·gipa ramako sorkari tarie on·na dongkujaenga aro iani a·selan songni nokni manderang, nangchongmota bosturangkoba motor bike-rangosa salangna nangengachim.
Rongsu A·gal songona rama jal·langrangko tarie on·kujaengani a·sel da·o gita wachini somoirango songni manderang neng·nikanirangko chagrongna nangbatronga ineba songni manderang parakataha.
“Da·ode Rongara-Siju constituency-ni MLA Rakkam A Sangma-ba NPP-chi dilenggipa MDA sorkario minister ong·paengahachim indiba da·alona kingkingan Rongsu A·gal songona ua rama jal·langrangko tarie on·na dongkujaenga. Unbaksana GHADC-ni chief executive membor (CEM) Albinush R Marak-ba apsan constituency-onin ong·achim indiba uaba chingni songko nirok sandia dongja,” ine Rongsu A·gal songni manderang, suk ong·gijaniko parakattokaha.
Jolo songdongenggipa manderangni parakatani gitade, Rongsu A·gal songoni Siju Dobakkol-ona kilometre 36-mang donga aro ia songona gari gora soke man·jani a·selan songni nokni manderang merong-mechurangkoba an·tangtangari chilesa ja·achi ra·angna gita nangronga.
“Chinga chingni MLA-o ka·dongenba election-o ukon seokahachim aro uni MLA ong·chengaoni da·o bilsidok ong·pilengahaoba ua da·alonan chingni nanganirangko niatkujaenga. Indide chingara sano maikai ka·dongna man·kugen?” ine songni budepa saksa suk ong·gija parakataha.
