SHILLONG: Politics-ko torom baksa nangatna nangja ine Congress dolni dilgipa Manuel Badwar aganaha.
Salgro salaram jolrango, mongsongbate Meghalaya, Nagaland aro Manipur a·dokrango ‘badiaba toromni’ manderang BJP-ni kosako pu·onahani a·selsa NDA-ni candidate-rang amako man·aha ine adita salrangna skang, Assam-ni Chief Minister aro North East Democratic Alliance (NEDA)-ni convenor Himanta Biswa Sarma aganahani gimin Congress dolni dilgipa ia kattarangko aganskaaha.
Sarma-ni agangipa kattarangara salgro salaram a·dokrango BJP-ni bilgrianganina agangipa kattarang gita ong·aha ineba Badwar aganaha.
“Ua (Sarma) gipin torom aro gipinrangni bebera·ani gimin iandake aganna man·ja indiba ua an·tangni skani gitasa chanchia aro aganrongaia,” ine Congress dilgipa aganaha.
“Meghalaya, Nagaland aro Manipur a·dokrango badiaba toromni manderang, NDA-ni kosako pu·onaha aro ia a·dokrango ia toromko ja·rikgiparang bang·a gimin dingtanganiko nikna man·aha. Ian politics-ni gita amako man·ani ong·ja maina darangba toromni kosako dakgrikna man·jawa,” ine re·anggipa June-ni 4 tariko Assam-ni Chief Minister Himanta Biswa Sarma aganahachim.
Indake ong·engon, Assam-ni chief minister-ara dilani gun donggijagipa ong·a aro ua Assam baksana a·song gimikon BJP-ni bilgrianganiko niksoenggipa ong·a ine Badwar parakatskaaha.
Badiaba politician-rang voter-rangko salna gita toromko jakkalaha ine Meghalaya a·dokni Education Minister aro NPP-ni dilgipa Rakkam A Sangma-ni agananikoba Badwar raken jegalataha.
Meghalaya a·dokni minister, chanchininggijasa kattarangko aganaha ine janapatengon, “Iandakgipa dilgiparangan a·doko tom·tomani aro namroro silroroaniko nisigalgiparang ong·a aro iandakgipa mandeko dilgipana seokani gimin anga manderangna ka·sachaka,” ine Badwar aganaha.
