SHILLONG: Congress dolni gitcham dilgipa Mukul Sangma aro uni jonggipa Zenith Sangma adasa sakgnikon Congress dolona re·bapilaniko nangnikja ine Sombar salo, Tura Lok Sabha constituency-ni Congress MP Saleng A Sangma parakataha.
“Dr Mukul Congress-ona re·bapileng-re·bapiljaeng, indiba kakketko agangenchimode chinga uko re·bapilanikoba nangnikjawa. Apsan daken Zenith-koba chinga re·bapilchina nangnikjaenga,” ine Saleng aganaha.
Iani miksonganide uamang adasa sakgnina Congress-o biap dongjahama ine sing·on, “Haida, indiba uamang anggita re·bagenchimode angade uamangna biapko on·na man·jawaha,” ine Saleng aganaha.
Uko Mukul Sangma aro gipin dilgiparang, Congress dolona re·bapilchina okamatahama ine sing·anina aganchakaniko on·angskaengon, “Anga an·tangde iani bidingo knaa dongkuja, haida uamang gipin dilgiparangko okamatengnaba gnang indiba angkode okamata dongja,” ine Tura-ni gital MP aganaha.
“Congress dolode chinga an·tangari mamingkoba tik ka·na man·ja aro pilakan re·banade man·aia indiba chinga name nipilna nangchongmotgen maina uamang skango gita golmal ka·tainaba gnang. Kakketkon aganenga, mitam manderangde re·bapila dakenba ja·mano Congress dolni name chalaiengako golmal ka·taiani cholrang dongaia,” ine Saleng aganaha.
Politics-ode ripeng ba bobil ong·kamani dongja ine mesokani on·anina aganchakaniko on·angskaengon, “Je manderangan tol·giparang, cha·bokgiparang aro ong·gija kamrangko ka·a, uandakgipa manderangde chingni bak ong·na man·jawa aro chinga man·a dipet iakon ja·rikangna jotton ka·gen,” ine ua aganaha.
Trinamool Congress (TMC) una dakchake on·aha ine agananiko jegalatskaengon, “Trinamool angna maming dakeba dakchakaniko on·jaha indiba pu·ongiparangsa angko seokaha. TMC ba gipinrangko gualbo anga badiaba manderangni giminsa aganenga. Chingko darang party ba dilgiparangde dakchakjaha indiba manderang aro Isolmangmangsan angna dakchakaha,” ine Saleng aganaha.