TURA: South Garo Hills a·jao Rongsu A·gal songona rama jal·langrang dongjani a·selo neng·nikanirangko chagrongna nangtokenga ine songni manderang parakatani ja·man Rongsu jolo songdongenggipa manderangni namgnina Siju-oni Rongsu-ona rama jal·langrangko tarie on·china dabie A·chik Holistic Awakening Movement (AHAM) Siju regional unit, a·dokni Chief Minister Conrad K Sangma-na sedoataha.
Chief Minister-na sedoatgipa chittio AHAM Siju unit-ni parakatani gitade, Meghalaya a·dokko man·chengaonin Siju-oni Rongsu-ona rama jal·langrangko tarie on·a dongkujaengani a·sel jolo songdongenggipa manderangni salanti janggi tanganio neng·nikanirangko chagrongna nangan baksana Rongsu jolrango mamingni gitan namroro silroroaniko nikna man·kujaengachim.
“Meghalaya a·dokko man·chengaonin Siju-oni Rongsu songona namgipa rama jal·langrangko man·kujae songni manderang re·a doanirango, an·tangtangni nangchongmotgipa bosturangko salruraanio aro bading chiwalanirangoba neng·nikanirangko chagrongna nangtokenga. Rongsu jolrangona da·onan rama jal·langrang dongkujani a·sel ian a·dokni gipin biaprang baksade ma·ekatako man·a gitasa ong·kuaienga. Ia jolrango songdongenggipa manderangni da·o re·ruraenggipa cholrangba obostarang namsrangja aro wachini somoirangode ian manderangni janggirangna kenchakna nanganiba ong·enga,” ine AHAM Siju regional unit-ni dilgiparang, Chief Minister-na sedoatgipa chittio parakataha.
Rongsu jolrango songdongenggipa manderangna re·a doani cholrangko namdapatna gita Simsang chibimako RCC dolong kabate on·chinaba AHAM Siju unit didiataha.
“Siju aro Rongsu-ni gisepo Simsang chibimako RCC dolong kabate on·genchimode ian songni manderangna re·ruraanirango aro ma·manti bosturangko salruraanioba bang·en dakchakani ong·gen. Rongsu jolrango songdongenggipa manderangna da·o gita wachini somoirango Simsang chibimara namen kenna nangani ong·a, uni gimin bilsigimik songni manderang maming kennani gri songre songgabatna man·na gita Simsang chibimako RCC dolong kabate on·china chinga didienga,” ine AHAM Siju regional unit-ni dilgiparang, a·dokni Chief Minister Conrad Sangma-na sedoatgipa chittio janapataha.