TURA: Meghalaya a∙dokni State Reservation Policy (SRP)-ko gital dake nipiltaianio, dingtang dingtang dolrangni aro a∙doko songdongenggipa manderangni nangnikani aro chanchianirangkoba Expert Committee ra∙engani gimin ia 1972 bilsini State Reservation Policy-ko skango gitan donaichina aro taridapjachina gita Tura-ni Chada, Rechil Napak Mahari Union (CRNMU)-ba dabiangaha.
Iani bidingo CRNMU Tura Executive tom∙tomaniko ong∙atangenba, 1972 bilsini Meghalaya State Reservation Policy-kon ja·rikangkuchina aro ia Reservation Policy-ko taridapjachina gita expert committee-ko ku∙pattiatna tik ka∙e donangaha.
Manderangni janggi tangani gadang, lekka-porani gadang, sorkario kam ka∙ani gadang aro pilakni gitan A∙chikrang ja·manchakkuengani gimin State Reservation Policy-ko taridapgija skango gitan apsan niamko ja∙rikangkuna nanga ineba ia tom∙anio, CRNMU-ni membor-rang tik ka∙e donangaha.
Meghalaya a·dokko man·aoni bilsi 50 gappilahaoba da∙alonan A∙chikrangna State Reservation Policy-ni mongsonggipa miksonganikon chu·sokatkujaenga ineba ia tom∙anio CRNMU-ni dilgiparang parakataha.
“Meghalaya a∙dokni bilsi 50 gapanio A∙chikrang an∙tangtangna chamgimin bak rengsiko da∙onan chu·gimik man∙kujaenga, uni gimin a∙dokni Reservation Policy-ko taridapgija skanggipa A∙chikrangni man∙na nangkuenggipa bak rengsirangko tikatchengna nangenga,” ine CRNMU, Tura-ni dilgiparang parakataha.