SHILLONG: Meghalaya a·dokni Ri Bhoi a·jao aro Shillong songjinmao kamrangko ka·enggipa Hynniewtrep National Liberation Council (HNLC) bobil dolni sleeper cell-ko Ri Bhoi a·jani police-rang rim·na man·aha.
Meghalaya a·dokni dingtang dingtang biaprango HNLC bobil dolni manderang, tangka dabiani lekkarangko on·angani ja·man police-rang am·sandianirangko dakenba HNLC bobil dolni sleeper cell-ko rim·na man·aha.
Ri Bhoi a·jani Superintendent of Police (SP) Jagpal Singh Dhanoa-ni u·iatani gitade, HNLC-ni sleeper cell-ko Ummat songni Cyfrank Paul Pariat minggipa mande dilengachim aro ia mandeni dilanichi sleeper cell-ni membor-rangan, a·doko songdongenggipa aro bading chiwale cha·enggipa dingtang dingtang manderangna tangka dabiani lekkarangkoba on·angahachim.
Indake ong·engon, Ri Bhoi a·jani police-rang, joint operation-ko dakenba, June-ni 10 tariko, ia sleeper cell-ni mongsonggipa membor sakgittamko rim·na man·aha ine SP parakataha.
Rim·ako man·gipa manderangara, Ummat songni bilsi 25 ong·gipa Cyfrank Paul Pariat, apsan songni bilsi 23 ong·gipa Kitbok Mujai aro Khyndewso songni bilsi 49 ong·gipa Barnabas Lyngdoh ong·a.
Ia manderangan HNLC-ni gital membor-rangna skie on·anio, tangka paisarangko nitimanio aro dingtang dingtang kamrango jak donggiparang ong·achim ineba police-rang ma·sina man·aha.
Dhanoa-ni parakatani gitade, rim·a man·gipa HNLC-ni membor sakgittam, re·anggipa bilsio training-ni kamrangna Bangladesh-ona re·angahachim.
Ia manderangni kosako police-rang Umiam Police Station-o mokordoma ka·aha aro bobil dolni gipin membor-rangkoba rim·na gita am·sandianirangko dakna a·bachengataha ineba Ri Bhoi a·jani SP parakataha.
HNLC-ni dabianirangna bame on·jachina aro iandakgipa manderangni gimin koborrangko man·genchimode ta·raken police-rangna u·iatskachina gitaba SP, a·dokni manderangko didiataha.