SHILLONG: Ia bilsini Lok Sabha election-o National People’s Party (NPP)-ni voter-rang bang·en Congress dolna pu·onahani gimin ia voter-rangko rimbapilna gita NPP-ni saksa dilgipa aro Meghalaya Assembly-ni Deputy Speaker Timothy D Shira ku·rachakangaha.
Adita salrangna skang ong·atanggipa Lok Sabha election-o NPP-ni bang·a voter-rangan Congress dolna pu·onahani a·sel Tura Parliamentary constituency-o Congress dolni candidate Saleng A Sangma, bang·bea vote-rangchi, NPP-ni candidate aro Tura-ni gitcham MP Agatha K Sangma-ko amchepatahachim ine nikna man·a.
NPP-ni bang·a voter-rangan Congress dolona apjitangaha ine ku·chakangengon, ia voter-rang Congress dolona apjitangjagenchimode Lok Sabha election-o NPP amako man·jawachim ine Shira aganaha.
“NPP-ni voter-rangko rimbapilna gita chinga jekoba aro pilakkon dakaigen,” ine Shira parakataha.
Shira-ni Resubelpara constituency-oba Congress dolni amahani gimin sing·anina aganchakaniko on·angengon, a·dokni Chief Minister Conrad Sangma-ni South Tura constituency-ko man·chape Congress dol, Tura Parliamentary constituency-ni bang·bata biaprangon chegipa ong·aha ine Resubelpara MLA parakataha.
Maini a·sel ia Lok Sabha election-o NPP tang·onangaha ine sing·skaon, ia election-o BJP candidate-ko susaatjahani gimin bang·a manderangan NPP, BJP baksa bakrimaha ine chanchichipani ong·kattokaha ine Shira aganaha.
“Political dolrangni gisepo bakrimani aro napanio dingtanggrikani donga ine manderang ma·sijaha. Ian a·dok sorkarini kosako seokani ong·ja,” ine Shira a·kangataha.
Maikai NPP-ko bilakatpiltaina miksongenga ine sing·aninade ua mamingkoba aganchakna jechakskaaha.
Tura Lok Sabha constituency-o bilsi 40 batpile PA Sangma-ni nokdongoni MP ong·e dongangani ja·man ia chang Congress dolni candidate Saleng A Sangma, PA Sangma-ni demechik aro changgnina MP ong·anggipa Agatha K Sangma-ko 1,55,241 vote-rangchi amchepatskaahachim ine nikna man·a.
Tura Lok Sabha constituency-o Congress dolni candidate Saleng Sangma, 3,83,919 vote-rangko aro NPP-ni Agatha Sangma, 2,28,678 vote-rangko man·rikahachim.
