MAWKYRWAT: South West Khasi Hills a·jani song damsao me·chik bi·sa sakbriko samba jolo donggipa songni sak 12 manderang, rim·gittangenba drae til·ekaha ine kobor on·aha.
Iani bidingo GSU Khasi Hills Zone aro AHAM SWKH, u·iataniko on·atengon, dos dakgipa manderangko rim·enba rakbatgipa sastirangko on·china dabiangaha.
Koborko on·ani gitade, ia me·chik bi·sa sakbriara bilsi 13 aro bilsi 14 ong·gipa me·chik bi·sarangsan ong·aiachim aro uamangko uamangni ripeng dakmikgipa manderang sambao donggipa songona okamatani ja·man sak 12 manderang drae til·ekaha. Ia me·chik bi·sarang Sukrobar salo, ua songona re·angahachim aro Robibar salosa noktangtangona sokbapilahachim.
Ia a·sel ong·ani Sukrobar attamni 7:00 bajimango ong·aha aro uni ja·man ia me·chik bi·sarang gimaangaha ine kobor on·aha.
Ia me·chik bi·sa sakbriko, uamangni ma·drangrang sandiangenba Robibar salosa man·eaha aro iani ja·man me·chik bi·sa sakbrini ma·drangrang, dos dakgipa manderangni kosako FIR ka·doangaha.
Ia case-ko Mawkyrwat Women’s Police Station-o mokordoma ka·aha aro da·o police-rang ia a·selni bidingo sandirokna a·bachengataha ineba u·iataha.
“South West Khasi Hills a·jani Nonghyllam Police Station-ni ning·o donggipa songo me·chik bi·sa sakbriko mande jinma drae til·ekahani gimin chinga dos dakgipa manderangni kosako raken jegalenga. Ia a·selo ga·akgipa me·chik bi·sa sakbrini nokdangrangna chinga kalimpaaniko on·enga,” ine Khasi Hills-ni GSU aro AHAM parakataha.
Ia a·selni bidingo ta·raken sandirokenba dos dakgipa manderangni kosako rakbatsranggipa sastirangko on·china gitaba dolgni NGO-rang dabiangaha.
