SHILLONG: Meghalaya a·dokni skotong Shillong songjinmao mingsinggipa Pinewood Hotel-ko taridapanio, tender-ko okamgija saksa Vikram Singhania minggipa contractor-na gong krorni kror ong·gipa kamko sorkari on·aha ine All Meghalaya Contractors & Suppliers Association (AMCSA) matnangataha.
Koborko on·ani gitade, ia hotel-ko taridapna gita a·dok sorkari, tangka paisarangko Meghalaya Age Limited gitasa on·enga aro Tourism Department ba ia hotel-ko chalaienggipa Meghalaya Tourism Development Corporation (MTDC) gitaba on·jaengachim.
Ia Pinewood Hotel-ni gital bimangko tarina gita a·dok sorkari, France a·songni consultant-ko ra·ahachim ineba kobor on·timgiparang parakataha.
Kobor on·timgiparangni parakatani gitade, ia Hotel-ko taridapna gita contract-ko man·gipa Vikram Singhania-ra register ka·gimin contractor-ba ong·jachim.
Indake ong·engon, re·anggipa Mongolbar salo AMCSA-ni membor-rang, a·dokni Tourism Director Cyril VD Diengdoh-ko grongenba, Singhania-na on·gipa contract-ko den·galpilchina dabiangtokaha.
Tourism Director-ko grongani ja·man kobor ra·timgipa manderang baksa agangrikengon, ia kamna Expression of Interest (EoI)-ko okamchenggija maikai sorkari, kamko iandake on·na man·aha ine AMCSA-ni chief advisor Gilbert Laloo sing·doangaha.
Laloo-ni aganani gitade, ia kamko tender gri on·aniara niamni a·palo ong·aha maina ia kamko sorkari, register ka·gijagipa gipin jat contractor-nasa on·ahachim.
Kamrangko pangnan parak ong·e ka·enga ine a·kangrongeba iandakgipa kamrangko sriksrik ka·na jotton ka·engani gimin ua NPP-chi dilenggipa MDA sorkariko matnangataha.
Laloo-ni aganani gitade, Nongpoh-Umden-Sonapur ramako tarina gita sorkari skanggipa DPR-ko tarichengesa tender-na okamna nangkugen ine adita salrangna skangsan a·dokni Deputy Chief Minister Prestone Tynsong, ia ramako tariningjaengani gimin aganchakaniko on·angahachim.
Ia Pinewood Hotel-ko taridapani kam baksana gipin kamrangkode sorkari, apsan daken tender-na okamgija sriksrik on·enga ineba ua matnangataha.