AMPATI: Bristibar salo, a·dokni Education Minister Rakkam A Sangma, South West Garo Hills a·jani Balalgre songo rikenggipa Captain Williamson Sangma State University-ko niangaha aro ia university-ko niangani somoio Education Minister baksana Education department-ni Adviser HM Shangpliang, Meghalaya State Education Commission (MSEC)-ni membor-rang aro department-ni gipin official-rangba dongpae bak ra·angaha.
Ia university-ko nianganiara, a·doko lekka porako namdapatna gita MSEC membor-rangni salgittamna Garo Hills-ona re·baani bak gita ong·aha.
Ia State University-ko niangani somoio a·dokni Education Minister aro MSEC-ni membor-rang, South West Garo Hills a·jani Education official-rangkoba gronge, a·jao lekka porako namdapatani bidingo chanchirimangaha.
Ia tom·anio, MSEC-ni membor-rang, SWGH a·jani dingtang dingtang official-rangna agan-ku·pattianirangko on·angan baksana dingtang dingtang official-rangni aro skul-college-rangko chalaienggipa manderangni agan-ku·pattianirangkoba knatime ra·angaha.
