TURA: East Garo Hills a·jani Dobu Primary Health Centre (PHC)-o da·o dipet doctor saksasan ong·e sagipa manderangko sanna bananio neng·nikanirangko chagrongna nangenga ine A·chik Holistic Awakening Movement (AHAM) Dobu regional unit parakatenba, ia PHC-na MBBS doctor saksako on·dapchina East Garo Hills a·jani District Medical & Health Officer (DM&HO)-na sedoataha.
AHAM Dobu regional unit-ni parakatani gitade, Dobu PHC-ara Williamnagar Civil Hospital-oni namen chel·ani gimin ian Dobu jolrango donggipa dingtang dingtang songni manderangna mongsonggipa sanchakram biap gita ong·engachim indiba ia health centre-o doctor saksasan ong·e, indita bang·bea manderangko nirok sandianio aro sanna bananirangko on·anio neng·nikanirangko chagrongna nangengachim.
“Dobu PHC-na doctor saksako on·dapgenchimode, sagipa ding·giparangko nirok sandianio aro sanna bananio kamrangko nambate ka·na man·gen,” ine AHAM Dobu regional unit-ni dilgiparang, East Garo Hills a·jani DM&HO-na sedoatgipa chittio janapatenba, ia health centre-na ta·raken MBBS doctor saksako watatchina mol·molataha.
