GH-o Int’l Day Against Drug Abuse & Illicit Trafficking Awareness program-ko ong·ata

TURA: Pekatgipa samrangko jakkalanichi mandena aro songsalna namgijaniko ra·bana man·ani gimin jinmana, mongsongbate chatro chatrirangna agan-talate on·na gita Sukrobar salo, International Day Against Drug Abuse & Illicit Trafficking Awareness program-ko Garo Hills-ni dingtang dingtang biaprango ong·atangaha.
South West Garo Hills a·jao ia program-ko Social Welfare department-ni Nasha Mukt Bharat Abhiyan-ni ning·o Ampati Multi Facility Centre-o ong·atangaha aro ia program-ko ong·atanio South West Garo Hills a·jao donggipa dingtang dingtang skulni chatro chatrirang bak ra·angtokaha.
Ia program-ko ong·atanio, South West Garo Hills a·jani DSP Ravi K Sangma, jinmana aganprakangengon, pekatgipa samrangko jakkalanichi maikai mandena aro mongsongbate chadamberangni janggi tanganiko nosto ka·na man·achim, uarangni bidingo agan-talate on·angenba, iandakgipa bosturangoni chel·e dongchina chatro chatrirangko didiangaha. Rongtale janggi tangchina, ong·gija kamrangoni chel·e dongchina aro banoba iandake drugs jakkalani ba badingsrukanirangko nikgenchimode ta·raken police-rangna u·iatchina gitaba Sangma, chatro chatrirangko didiangaha.
Ia program-ko ong·atanio, Ampati-ni Medical & Health Officer Dr Matgrik K Sangma-ba jinmana aganprakengon, pekatgipa samrangko jakkalanichi maikai mandeni be·enna nangchakeaniko ra·bana man·a, uarangni gimin agan-talate on·angaha.
Ia tom·anio Ampati DCPU-ni Legal-cum-Probation Officer Tanya Derimchi Ch Marak-ba, chatro chatrirangna agan-ku·pattianirangko on·angengon, pekatgipa samrangko jakkalani aro badinganiko champengna dongimin niamrangni bidingo agan-talate on·angskaaha.
Pekatgipa samrangoni chel·e dongna aro India a·songko drugs-rangoni jakgitel ong·atna gitaba ia tom·anio jinma ku·mikchetaniko dakangaha.
Ia International Day Against Drug Abuse-ko maniani bak gita re·anggipa June-ni 7 tariko South West Garo Hills a·jao slogan sesusaanikoba ong·atangahachim aro ia slogan sesusaanio nambatgipa sakgittamna boksisrangko on·angaha.
Ia apsan dakgipa program-ko re·anggipa June 11 tariko Garobadha Govt Higher Secondary School-oba ong·atangahachim.
North Garo Hills a·jaoba ia International Day Against Drug Abuse & Illicit Trafficking Awareness program-ko Sukrobar salo, District Mental Health Program, District Legal Services Authority (DLSA) aro Mendipathar College-ni NSS Unit nangrimenba, Mendipathar Manikganj Secondary School-o ong·atangaha aro ia program-ko ong·atanio North Garo Hills a·jani Additional Deputy Commissioner (ADC) Jude Rangku T Sangma aro Superintendent of Police (SP) AT Sangma, mongsonggipa sokgiparang ong·e bakko ra·angaha.
Ia program-ko ong·atanio North Garo Hills a·jani ADC aro SP, chatro chatrirangna agan-ku·pattianirangko on·angengon, pekatgipa samrangko jakkalanichi maikai mandena, nokdangna aro songsalna namgijaniko ra·bana man·a, uarangni gimin agan-talate on·angaha.